‘Ikai Tali ‘e he Fakamaau’anga Lahi ‘Eke $1.5 Miliona ‘a e Pangikē ANZ meia Nopele Lasike Featured
Kuo tu’utu’uni ‘e he Fakamaau’anga Lahi ‘i he ‘aho Falaite 20 ‘o Ma’asi ke ‘oua ‘e tali ‘a e ‘eke Pa’anga ‘e 1.5 Miliona ‘a e Pangikē ‘Aositelelia mo Nu’usila (ANZ Banking Group) meia ‘Eiki Nopele Lasike. Ko e hopo ‘eni ‘i hono ‘eke ‘e he Pangike ko’eni ‘a e totongi koe Pa’anga ‘e 929,639.64 tanaki atu ki ai moe peseti ‘e 12.5% koe totongi tupu ‘o lau mei he ‘aho 28 ‘o Sepitema, 2009.
Na’e makatu’unga foki ‘a e hopo ko’eni ‘i he noo na’e fakahoko ‘e he ‘Eiki Nopele ki hono langa mo fakalele ‘o e Motele Sandy Boys ‘a ia na’e tu’u pe ‘i he Hala Taufa’ahau ‘o hanga hake ki he Senita Langafonua ‘a Fafine Tonga. Na’e talu hono fakahoko ‘o e faka’ilo ko’eni ‘i he ta’u 2009 pea ko’ene toki fakakakato ‘eni ‘a e hopo koia.
Ko e hopo foki ko’eni na’e fakahoko ‘i he Fakamaau’anga Lahi ‘e he Fakamaau Lahi ko Cato (Justice Cato) pehe ki he Kau Sula ‘a ia na’a nau aofangatuku ‘a e tu’utu’uni ki he hopo ko’eni. Na’e fe’unga mo e uike ‘e ua kakato ‘a e lele ‘a e hopo ni pea koe alepau noo ‘e valu ‘a ia na’e fakahoko hono fakakikihi’i ‘e he ongo tafa’aki.
Na’e tali lelei ‘e he faka’iloa ‘Eiki Nopele Lasike ‘a e fo’i aleapau ‘e ua ‘a ia na’a ne pehe ‘oku mo’oni pea kuo ‘osi totongi kakato ia ‘o ‘ikai ha mo’uao e toenga ‘o e alepau ‘e ono kehe na’e ‘ikai fakahoko ‘e he faka’iloa ha fakamo’oni hingoa kiai ka na’e fakakikihi’i ‘e he Talatalaaki ‘oku ‘i ai ‘a e fakamo’oni fe’unga kiai.
Na’e mahino foki mei he tu’utu’uni ‘a e Kau Sula ‘oku ‘ikai fe’unga ‘a e fakamo’oni ‘a e fa’ahi ‘a e Talatalaaki ke fakamo’oni’i ‘a e ngaahi makatu’unga na’e fakahoko’aki ‘a e ‘eke ko’eni. Na’e fe’unga foki moe ‘aho ‘e taha moe konga ‘a e fakamalanga ‘a e Fakamaau Lahi (Justice Cato) pea ‘aho kakato foki mo e fakamalanga ‘a e Loea ‘a e Talatalaaki pea fe’unga mo e houa ‘e ua ‘a e fakamalanga tuku ‘a e Loea ‘a e Faka’iloa.
Na’e fakafofonga’i ‘a ‘Eiki Nopele Lasike ‘e William Clive Edwards Sr. mo Sunia Fili pea ko Petunia Tupou leva na’a ne fakafofonga’i ‘a e Pangikē ANZ. Fakatatau ki he fakamatala ‘a William Clive Edwards koe ‘eke pa’anga lahi taha ‘eni kuo fakahoko ‘e ha Pangike ki he tokotaha taautaha ‘i he hisitolia ‘o e fonua ni.
