'Ikai Tali Fakamaau'anga Lahi Fokotu'u mei he PSA mo Mele 'Amanaki Featured
Na’e ‘ikai tali ‘e he Fakamaau Lahi ko Scott ‘a e fokotu’u ke ‘ohake ki he Fakamaau’anga Lahi ke toe fai hano vakai’i ‘a e tu’utu’uni ke totongi ‘e he PSA mo Mele ‘Amanaki ‘a e mamau mo e ngaahi fakamole ‘i he hopo na’e fakahoko ‘i he malumalu ‘o e Fakamaau’anga Polisi ‘i he ta’u 2014.
Na’e ‘ikai tali ‘e he Fakamaau ‘a e kole ko’eni ‘a ia na’e fakahu atu ‘e he Loea ma’ae PSA mo Mele ‘Amanaki koe mataotao Nu'usila ko Dr Harrison QC. Na’e fakaha pe foki ‘i he Tu’utu’uni ‘a Scott ‘i he ‘aho 6 ‘o Ma’asi na’e fakahū ha faka’ilo ‘e ua fekau’aki mo Mele ‘Amanaki mo e PSA ‘i Me ‘o e 2014 ki he Fakamaau’anga Polisi fekau’aki mo e laui’i kovi’i ‘i he ngaahi tohi na’e pulusi fekau’aki mo e ‘Eiki Palemia Malolo Lord Tu’ivakano, Pilinisesi Pilolevu mo e Tongasat pehē kia William Clive Edwards ‘a ia na’e ‘eke ai ‘e he Talatalaaki ‘a e pa’anga ‘e 10,000 ki he maumau 'o e ongoongo ki he Talatalaaki 'e taha ‘a ia koe ma’olunga taha pe foki ia ‘oku ‘i he mafai ‘o e Fakamaau’anga Polisi.
Ko e faka’ilo foki ‘eni makatu’unga ‘i he ngaahi tohi ne tukuaki’i ai ‘e Mele ‘Amanaki mo e PSA ‘a e Talatalaaki Lord Tu’ivakano, Pilinisesi Pilolevu mo e Tongasat pehē kia William Clive Edwards ki hono ngaue hala mo ta’efakalao ‘aki ‘a e Pa’anga tokoni mei Siaina ‘a ia ‘oku fakafuofua ki he Pa’anga ‘Amelika ‘e 25 Miliona tupu.
Na’e fakafepaki’i lahi ‘a e kole ne fakahoko tohi ‘e Dr Harrison ki he Fakamaau’anga Lahi ‘e Mr Stanton SC pea mo William Clive Edwards ‘a ia na’a na fakafofonga’i ‘a e Tafa’aki ‘a Lord Tu’ivakano, Pilinisesi Pilolevu mo e Tongasat pehe kia William Clive Edwards 'o iku ki hono li ki tu'a 'e he Fakamaau 'a e Fokotu'u ko'eni.
Ko hono ‘ikai tali ‘e he Fakamaau’anga Lahi ‘a e kole ko ‘eni mei he PSA mo Mele ‘Amanaki ‘oku mahino ai pe mei ai tenau kei totongi pe ‘a e mo’ua Pa’anga fakafuofua ki he pa'anga ‘e 10,000 ki he tokotaha ‘a ia na’e Tu’utu’uni ‘i he malumalu ‘o e Fakamaau’anga Polisi mo ha ngaahi fakamole kehe ‘i he Fakamaau’anga Lahi.
Ko e kaveinga tatau pe foki ‘eni na’e fakahoko ‘aki hono faka’ilo fakataautaha ‘e he ‘Eiki Palemia ‘o e ‘aho ni Samiuela ‘Akilisi Pohiva ‘a e kau Faka’iloa tatau ‘a ia na’e ‘ikai tali mo ia ‘e he Fakamaau’anga lahi pea 'oku pau ai kene totongi mo e ngaahi fakamole ‘a e kau Faka’iloa ‘a ia ‘e ‘eve’eva atu pe ia ‘i he laumano.
