Mo'ua Pa'anga 2500 'Eiki Nopele Tu'i Ha'ateiho Featured
Nuku'alofa.
6 Ma'asi 2015
Na'e tu'utu'uni 'e he Fakamaau Lahi ko Cato ke mo'ua pa'anga 'e 2500 'a 'Eiki Nopele Tu'i Ha'ateiho hili ia ha'ane halaia ki hono ma'u mo tauhi ta'e fakalao 'a e pekenene milimita 'e 22 'o 'ikai ha Laiseni.
Na'e tali tonuhia foki 'a e 'Eiki Nopele ki he faka'ilo ko'eni 'a ia koe meimei lava 'eni 'a e ta'u 'e 4 pea toki fakakakato mo aofangatuku 'a e hopo ni.
Ko hono hilifaki 'eni 'o e tautea ko'eni 'i he Fakamaau'anga Lahi 'i he efiafi Falaite ko hono 6 'o Ma'asi hili ia hano fakahalaia'i 'e he Fakamaau'anga lahi 'e Fakamaau Cato 'a e 'Eiki Nopele 'i he 'aho 21 'o Novema 'o e ta'u kuo'osi 2014. Ko 'Eiki Nopele Tu'i Ha'ateio koe Fakafofonga Nopele ia 'o e Vahefonua Ha'apai ki he Fale Alea 'o Tonga pea na'a ne hoko foki koe Tokoni Sea 'o e Fale Alea 'i he vaha'ataimi 'o e 2012 ki he 2014.
Na'e tu'utu'uni foki 'e Cato ke totongi 'a e pa'anga 'e 2500 ko'eni 'i loto he mahina pe 'e ua 'o kamata lau mei 'aneafi 6 Ma'asi 2015 pea ka 'ikai 'e malava leva ke tautea ngaue popula ki he mahina 'e ono. Neongo 'a e ngaahi fokotu'u mei he fa'ahi 'a e Talatalaaki na'e aofangatuku ai pe 'a e tu'utu'uni 'a Cato 'o makatu'unga 'i he lelei 'a e lekooti 'o e 'Eiki Nopele 'a ia ko'ene toki fuofua fakahoko 'eni ha hia pehe ki hono ngaahi fatongia falala'anga he fonua.
'Oku 'ikai foki uesia heni 'a e tu'unga hingoa Nopele 'o e Tu'iha'ateiho pehe ki hono fatongia lolotonga koe Fakafofonga Noplele ma'ae Vahefonua Ha'apai. Na' e fakafofonga'i 'e he 'Ateni Seniale Le'ole'o 'Amininiasi Kefu 'a e fa'ahi 'a e Talalaaki pea Kahu Afeaki ma'a e'Eiki Nopele.
