Mo'ua Pa'anga Valu Mano (TOP 80,000) Tupu 'Eiki Palemia Samiuela 'Akilisi Pohiva ^Featured

Na'e faka'ilo foki 'e Samiuela 'Akilisi Pohiva 'a e Ta’ahine Pilinisesi Pilolevu Tuita, Lord Tu’ivakano pea mo William Clive Edwards fekau’aki ‘eni mo e pa’anga tokoni mei Siaina ‘oku fe’unga mo e $18 miliona 'a ia na’a ne tukuaki’i 'a e kau faka'iloa ‘o pehe na’e ma’u 'a e pa’anga ko'eni ‘i he founga kaka, kaiha’a pa’anga mo e lototaha ke kaunga kaiha’a.

Na'e fakahoko foki 'a e hopo ko'eni 'i he Fakamaau'anga Polisi 'e he Fakamaau Polisi ko Salesi Mafi. Na'e Tu'utu'uni ai foki 'e Salesi Mafi 'oku 'ikai ha makatu'unga ki he hopo ko'eni pea ke tukuange 'a e kau faka'iloa pea ke totongi ai 'e he talatalaaki 'a ia koe 'Eiki Palemia ia 'o e 'aho ni Samiuela 'Akilis Pohiva 'a e pa'anga fakafuofua ki he fa mano (40,000) tupu 'o fakatatau pe 'eni ki he mafai 'o e Fakamaau'anga Polisi ki he kau faka'iloa kau katoa 'i heni mo e ngaahi fakamole kotoa. Na'e fakahu ai heni 'a e tangi 'a e 'Eiki Palemia 'o e 'aho ni Samiuela 'Akilisi Pohiva ki he Fakamaau'anga Lahi pea 'ikai tali 'i he konga kimu'a 'e 2014. Ko hono aofangatuku 'eni 'pea fakahoko ai 'a e Tu'utu'uni aofangatuku ki he tangi ko 'eni 'e he Fakamaau Lahi Scott 'i he 'aho ni Falaite 6 'o Ma'asi 2015 'a ia koe 'eke ia 'a e totongi huhu'i 'e he kau Faka'iloa.

'I he'ene pehe leva fakatatau ki he fakamatala 'a e taha 'o e kau loea 'a e kau Faka'iloa William Clive Edwards, kuo pau ke totongi 'e he 'Eiki Palemia 'a e pa'anga fakafuofua ki he valu mano (80,000) tupu koe totongi huhu'i ki he kau faka'iloa 'a ia ko hono tanaki fakataha ia 'o e Tu'utu'uni mo'ua pa'anga na'e 'i he malumalu 'o e Fakamaau'anga Polisi 'i he 2013 fakataha mo e ngaahi totongi ki he fakamole kotoa 'a e tangi ko'eni 'i hono fakahoko 'i he Fakamaau'anga Lahi 'o e fonua 'a ia 'oku hiki hake ai 'a e mo'ua ki he mahu'inga 'oku ha atu 'i 'olunga.

Na'e fakafofonga'i foki pe 'e he 'Eiki Palemia ia 'i he hopo ko'eni he 'aho ni pea William Clive Edwards leva ma'ae kau faka'iloa.