Faka’ilo Kōvana Ha’apai ki he Faka’uli Ta’etokanga Featured
Nuku’alofa, 20 Mē 2016. Kuo faka’ilo ‘e he Potungāue Polisi ‘a e Kōvana Ha’apai Mo’ale Finau ki he faka’uli ta’etokanga ‘o tupu ai ha lavea. Na’e hoko ‘eni ‘i he Hala Hihifo ‘i Tongatapu ‘i he ‘aho Tūsite 17 ‘o Mē ’a ia koe Tūsite ia ‘o e uike ni.
Na’e peila (bail) foki ‘a e Faka’iloa ‘o fakatatali kiha ‘aho ke hā ai ‘i he Fakamaau’anga Polisi fekau’aki mo e faka’ilo ko’eni. Fakatatau ki he fakamatala mei he Potungāue Polisi na’e hoko ‘a e fakatu’utāmaki ko’eni fakafuofua ki he taimi 7:00 pongipongi pea na’e faka’uli atu ‘a Mo’ale Finau ‘i he me’alele Pule’anga P1790 ‘o taumu’a faka-Hahake ‘o ne tui’i ai ha tangata’eiki ‘oku ne lue lalo ‘o taki mai ha pasikala.
Na’e lue pe foki mo taki ma ‘e he tangata’eiki ko’eni ‘a e pasikala ‘i hono kauhala ka na’e vave ‘a e lele ‘a Mo’ale Finau fakatatau ki he fakamatala mei he kau Polisi ‘o tupu ai ‘a e fakatu’utamaki ko’eni. Na’e hoko foki ‘a e lavelavea iiki pe ki he ‘ulu ‘o e tangata’eiki pea ‘oku ‘i ha tu’unga fakafiemalie pē.
Na’e lolotonga ‘i Tongatapu ni foki ‘a e Kōvana Ha’apai ke fakamo’oni ki he vā fengaue’aki ‘a Ha’apai mo e kolo ko Dongguan ‘i he vāhenga Guangdong Province ‘i Siaina ‘o hoko ai ‘a e fakatu’utāmaki ni
2 comments
-
Koe 'atunga pe ena hoo talangataa ki homou otua Ko Akilisi he nane osi tala ke tuku e ngaueaki e mealele fakapuleanga i tuataimi ngaue. Kaikehe kei omai pe mei langi ho faingamalie.
-
Kuo ita e kau tevolo haapai hoo hau o foaki a haapai maa Siaina ha ha ha ka ikai pe ne fuu fiefia aupito e tangata ia he foi mea ni e