Laumalie lelei pe 'a 'Amenani Kātinale Mafi hili ha’a ne tengetange ‘i ‘Aokalani Featured
'Amenani Kātinale Soane Patita Mafi
2 ‘Epeleli, 2017. Kuo ma’u ha fakamatala mei ‘Aokalani Nu’usila ‘oku laumalie lelei pe 'a 'Amenani Kātinale Soane Patita Mafi hili ia ha’ane tengetange ‘i ‘Aokalani Nu’usila he faka’osinga ‘o e uike.
‘I ha fakamatala mei he ‘Ulu’i ‘Ofisi ‘o e Siasi Katolika Loma ‘i Toutaimana na’e folau 'a 'Amenani Kātinale Mafi ki Nu’usila ‘o fakataumu’a ke hoko atu ai ‘ene folau ki Loma ki he fakataha faka-Kātinale ‘i he Vatikano.
Na’e ‘ikai kene ongo’i lelei ‘i he’ene tu’uta ki Nu’usila pea na’e mahino foki na’e tengetange pe ‘a 'Amenani Kātinale Mafi ‘i he’ene mavahe mei Tonga ni.
Na’e iku ke hoko 'a e fakatamaki faka sino ‘o pau ai ke leleaki’i ‘a 'Amenani Kātinale Mafi ki he Falemahaki Middlemore ‘i ‘Aokalani.
Kuo mahino mai foki kuo ‘i he tu’unga fakafiemalie ‘a 'Amenani Kātinale Mafi pea kuo fakapapau’i mei he ‘Ulu’i ‘Ofisi ‘o e Siasi ‘i Toutaimana ‘e me’a mai ai pe mei Nu’usila ki Tonga ni hili ‘a e ngāue fakafaito’o kiate ia ‘a ia kuo kaniseli ai pe ‘a e hoko atu ‘o e folau ki Loma.
2 comments
-
Fakamalo lahi moe hounga'ia Dan Halama he tokoni ki he fua fatongia 'oku fai pea 'oku tokoni lahi 'eni kiate kimautolu. Kole fakamolemole atu ai pe ki he kainga 'o e funga vaka ni na'a 'oku uesia 'i he ongoongo ni ka koe fakapotopoto taha na'e fakahoko'aki pea malo e tokoni lahi ke mau tuli fua kiai.
Malo 'Aupito -
Kātaki pē Nepituno kae ‘oatu pē ‘a e ki’i me’a ko eni na’a tokoni ki ho’o fua fatongia fakafaiongoongo. ‘Oku ‘ikai ngāue’aki ‘e he Katolika ‘a e designation “Tangata’eiki” ki he ‘Epikopō mo e Kātinale. Ko e ‘Epikopō ‘oku faka’aonga’i ki ai ‘a e designation ko e “’Eiki ‘Epikopō” (English: His Lordship) pea ko e Kātinale ‘oku faka’aonga’i e “Ko ‘ene ‘Amenani” (English: His Eminence).
Ko e kau Kātinale ‘i he ‘ātakai fakaKatolika ‘oku taku kinautolu ko e kau “Pilinisi” ‘o e Siasi he ko kinautolu ‘oku nau hoko hake ki he tu’unga fakaTu’i ko ia ko e Tu’i Tapu (English: Pope). Pea ‘oku ‘ikai ke tonu fakaTonga ia ke tau pehē “Tangata’eiki Pilinisi”, pe “Tangata’eiki Nōpele” mo e ngaahi tu’unga faka’apa’apa’ia ko ia.