Tu’uta ‘i Tonga ni naunau tokoni ki hono tau’i ‘o e COVID-19 Featured
Koniteina tokoni mei he ‘Akanesi Mataitonga Trust ‘a ia na’e fakafolau mai ai ‘a e tokoni ki he Falemahaki Vaiola. ‘Oku ha he taa ni ‘a ‘AKanesi mo hono hoa Viliami Mataitonga mo e Pule Lahi Potungaue Mo’ui Dr. Siale ‘Akau’ola pe he kia Dr. 'Ana 'Akau'ola mo Dr. Raynold 'Ofanoa
17 ‘Epeleli, 2020. Kuo tu’uta ‘i Nuku’alofá ni ‘i he Tokonaki ‘o e uike kuo ‘osi ‘a e ngaahi naunau ‘e fiema’u ke ngāue’aki ki hono sivi ‘o e COVID-19 mo e ngaahi naunau tokoni kehe pē.
Fakatatau ki he Pule ‘o e Falemahaki Vaiolá Toketā ‘Ana ‘Akau’ola ko e ngaahi naunau ko ‘ení ‘oku kau ki ai ‘a e mīsini faka’ata (x-ray) ‘e taha, mīsini ‘oku ngāue’aki ki hono sivi ‘o e COVID-19 (PCR) pea mo e ngaahi mohenga fakafalemahaki ‘e 36.
Ko e ngaahi mohenga fakakātoa ‘e 100 tupu ka koe mohenga pe ‘e 36 fakataha mo e fakamolū na’e lava ‘o fakaheka maí, ko e ‘ofa ia mei he ‘Akanesi Mataitonga Trust ‘i Nu’usila.
Ko e ngaahi naunaú ni na’e ‘omai kotoa ‘i he koniteina fute ‘e 40 ‘a e ‘Akanesi Mataitonga Trust. Na’e fakamālō’ia foki ‘e Toketā ‘Akau’ola ‘a e ‘ofa kuo fakahoko ‘e he fāmili Tonga ko ‘ení.
“’Oku ‘omai ia he fu’u taimi lelei ‘aupito pea ‘oku ou fakamālō ai ki he fāmili ko ení. Faingamālie e ha’u ‘a e ‘ū mohenga he taimi ko ‘ení ke fakanaunau ai pē ki he Falemahaki ‘i Mu’á, Kemi Taliaí pea mo e falemahakí he taimi totonu.”
‘I he fakamatala ‘a Toketā ‘Akau’ola ‘e ‘ikai ke lava ‘o ngāue’aki ‘a e mīsini PCR ka e ‘oleva ke a’u taki mai mo e ngaahi testing kits ko ia mei Pilitāniá. ‘Oku fakafuofua ‘e a’u hake ia ki Nu’usila ‘i he ‘aho 17 ‘o ‘Epeleli pea toki fai hono fakafolau mai ki Tongatapú ni.
“Ko e mīsini faka’ata ‘e ua na’e fakataú ‘a ia ‘oku $17,900 ‘Aositelelia ki he taha pea $90,000 leva ‘a e mīsini ki hono sivi ‘o e COVID-19.”
Na’e ‘i ai foki mo e ngaahi teunga malu’i (Personal Protective Equipment (PPE) ‘a ia ‘oku ngāue’aki ia ki he mahaki pipihí, na’e fe’unga hono lahí mo e toni ‘e 5 mo e konga ‘a ia na’e ‘omai ia he vakapuná ‘aneafi ko e tokoni ‘a e DFAT mei ‘Aositelelia.
“Ko e tokoni ko ‘eni ko e toni pe ‘e 5 mo e konga na’e lava ‘o fakaheka mai ‘a ia ko e toengá ia na’e toe fakafoki pē ia ‘o tuku ke toki ‘omai ‘a ia meimei ko e peseti ia ‘e 20 ‘oku kei tuku ‘i ‘Aositēlēliá.”
Na’e fakamanatu ai pē ‘e he Pule Lahi ‘a e Potungāue Mo’uí Toketā Siale ‘Akau’ola ki he kakai ‘o e fonuá ki ha ngaahi fehu’i pe fiema’u ha ngaahi fakamatala fekau’aki mo ha fa’ahinga me’a ke nau fetu’utaki ki he fika 0800933.
Ko e ngaahi naunau ko ‘ení ko e konga pē ia ‘o e mateuteu atu ‘a e Falemahaki Vaiolá ki ha taimi ‘e tu’uta ai ‘a e COVID-19 ‘i hotau fonuá.
