Ko e Fakana‘ana‘a ‘a e Fānau ‘a ‘Ulukālala ^Featured

1. Ka malū pea tau ē kakapu

‘Ihe ‘Otumotulalo[1] ‘o Vava‘u

Pea hangē pē ‘oku te folau

Kau ka vikia hangofia[2] atu

5. Neu tu‘u he toa ‘i Longomapu[3]

Tapa kihe Fakafanua‘amanu[4]

Kihe utu mai ‘ae motu ko Talau

Moe konga vao ‘i Pāhalau

‘Ohuafi kuo langa‘ia ‘ehe haha

10. Kuo tulekina ‘ehe tokelau[5]

‘O tokoto hifo ‘i Tolungahaku[6]

Falefata moe Hala Malumalu[7]

‘O mamata he loto ko ‘Utuuafu

Ha‘u ta tūkua he Hala Ngutungutu[8]

15. Kata hifo ki Tulukingavava‘u

Moe si‘i hifonga ‘i ‘Anaefu

Fanongoa mei ‘Anapupu

Si‘i ngala ‘ae ‘Otukalongalu[9]

Fakapō kuo langa ‘a ‘atu

20. Kuo fakaholo ki tokelau

Kuo kapa talifaki ē manu

‘I Tu‘ungasika[10] mo Luafatu

Luamoko moe motu ko Kitu

Si‘i falō ‘ae motu ko Vou

20. Kuo tafitonga ‘ehe malu

Uoi seuke! Na‘a koha mala

Hoto ‘ofa ki Vava‘u kuo langa

He fonua ne ngali kātoanga

Na‘e taha pē kiai ē tala

30. ‘Ihe lautele moe folivaka

Mo hono lelei fai‘eva‘anga

Kapau Ha‘afuluhao[11] hena taha

Pea ha‘u mu’a ‘o fanongo he ta‘anga

Viki ka tō lulunga[12]

35. ‘Alo ‘i tu‘a Hunga

Ka ko Totokafonua

Te tu‘u ‘i Tauta ‘o mamata ki Taula

Moe si‘i siale ‘o Mu‘omu‘a[13]

Ha maau koe ‘e ‘ikai matatua

40. Koloto ke tuku ‘a Tongatapu[14]

Moe Matahangale[15] kau ‘alu

Koe‘uhi ke lelu ai si‘eku ‘ofa

Kihe liku ‘i Matuanua

Si‘i manusiu ē ‘ene ngā

45. Koe mohe ‘apē ki Liku‘ā

Kae ‘ā kihe Fonongatoa[16]

‘O sio hifo he Toalofa

Kihe mapuna hake ‘ae la‘ā

‘Ihe hakenga ‘o Lepuhā[17]

50. ‘O toli he vao kulukona

Ke ‘omi ke fiuhekina ‘e taha

Ma‘ama teunga fakaNiua

Ke ngangatu hotau pōhiva

Ngaahi nouti fakafika ‘i ‘olunga:

[1] ‘Otumotulalo – ‘Oku toe ui pē koe ‘Otumotutonga, ‘o ‘uhinga ‘ae ‘tonga’ kihe saute (south), ‘aia ‘oku toe ‘iloa ko ‘lalo’ (down-under) koe ‘otumotu ‘oku tu‘u he ‘fakatonga’ (pē ‘fakalalo’) ‘o ‘Utavava‘u; vakai kihe tokelau (north), ‘oku toe ‘iloa koe ‘‘olunga’ (north).

 [2] Hangofia – ‘Oku matamata mo ngalingali koe ‘hangafia,’ ‘o hangē koe ‘vikia,’ ‘sania,’ ‘siofia,’ ‘āfia,’ moe ‘hūfia,’ ‘aia ‘oku ‘uhinga ‘ae ‘hangafia’ koe feitu’u ‘oku ‘hanga’ kiai ha taha pē me’a.

 [3] Longomapu – ‘Oku tu’u ‘ae fanga ko ‘Onetale (pē Fanga’onetale moe Funga’onetale) na’e fua lītaula ai ‘ae ongo toutai, tautai, moe kaivai ‘iloa Sēpeni ko Molele (1781) mo Malasipina (1793) he muifonua ‘fakahihifo’ (pē ‘fakalulunga’) ‘o ‘Utavava‘u, ‘o hanga kihe motu ko Hunga, pea moe Tu’ungasika (pē Tu’ungasika-‘a-Maui) hona vaha‘a.

 [4] Fakafanua‘amanu – ‘Oku ‘uhinga kihe ‘hū-he-ngalu-moe-peau’ (kuo heke fakanounou kihe ‘hūngaluopea’), ‘o hangē koe ‘akau, limu, moe veve ‘oku tētē ‘i tahi hono ‘fepalekina’ ‘ehe ngalu moe peau,’ ‘aia ‘oku hoko koe ‘fonua ‘oe manu’ (fakafanua’amanu pē ‘fakafonua‘amanu’), ‘aia koe mālōlō’anga ‘oe manupuna moe manusiufonua he moana; vakai kihe ‘fonua’ ‘oe ‘akau.

 [5] Tokelau – ‘Oku toe ‘iloa ko ‘‘olunga’ (up-above) moe ‘noate’ koe liliulea Tonga mei he lea ‘Ingilisi koe ‘north;’ vakai kihe ‘tonga,’ ‘aia ‘oku toe ‘iloa koe ‘saute’ koe liliulea mei he lea ‘Ingilisi koe ‘south.’ Vakai kihe ‘tō’olunga’ ha folau koe folau ‘oku ‘tōtokelau’ pē ‘tōnoate’ mo ‘tōlalo’ ha folau koe folau ‘oku ‘tōtonga’ pē ‘tōsaute.’

 [6] Tolungahaku – ‘Oku manakoa ‘ae hakau ni ‘oku tu’u ‘i tu’a Hunga koe toutai’anga mohu mo fonu ika.

 [7] Hala Malumalu – ‘Oku toe ‘iloa koe Hala Malu ‘o Talau.

[8] Hala Ngutungutu – ‘Oku ‘uhinga kihe Hala Liku moe Hala Mato, ‘aia ‘oku tu’u he ngutungutu lilifa mo mato.

 [9] ‘Otukalongalu – ‘Oku lahi ngāue’aki koe ‘Utukalongalu koe tupu mei he ‘heke’ ‘ae lea mei he ‘‘otu’ kihe ‘‘utu.’

 [10] Tu‘ungasika – ‘Oku ui kakato koe Tu’ungasika-‘a-Maui; Vakai kihe Longomapu.

 [11] Ha‘afuluhao – ‘Oku nāgue’aki koe hingoa fakatenetene ‘o Vava’u koe ma’u mei he lea Ha’amoa koe ‘safulusao’ (moe Vava’u mei he Vavau fakaHāmoa) ‘o toe kau ai ‘ae Vava’ulahi (he loto-to’a moe loto-māfana), Vava’uta’efietō, Lolo’ahalaevalu (pē Lolo), Fatafatamāfana (pe Fatamāfana), Matapā’opalataisi, moe ‘Iteni’oe’otukaveinga.

 [12] Lulunga – ‘Oku ‘uhinga kihe ‘hihifo’ (west), ‘o hangē koe ‘Otu, ‘Otumotu Lulunga (pē ‘Otu, ‘Otumotu Hihifo), ‘o kau ai ‘a Ha’afeva mo Kotu, moe ‘Otu, ‘Otumotu Mu’omu’a (‘Otumu’omu’a), ‘aia ko Nōmuka mo Nomukeiki ‘ihe ‘Otu, ‘Otumotu Ha’apai (‘Otuha’apai); na’e ma’u ‘ae lea ‘lulunga’ mei he ‘autō pē faka’autō ‘ae la’ā mei he tokelau he’ene ‘hopo’ mo ‘hake’ ki ‘olunga meihe hahake he’ene ‘tō’ mo ‘hifo’ ki hihifo, ‘o ‘uhinga ia ‘oku ‘lulunga’ ae la’ā he’ene hifo mei ‘olunga he tokelau ke tō ki hihifo ‘i lalo he tonga.

[13] Mu‘omu‘a – ‘Oku ‘uhinga kihe ngaahi motu ki tu’a he ‘Otumotulalo, ‘Otumotutonga, ‘oku taupotu kihe hangai kihe ‘Otuha’apai.

 [14] Tongatapu – ‘Oku toe ‘iloa koe Tonga’eiki moe Tongalahi, ‘o ‘uhinga koe Tonga ‘lahi’ he ‘‘eiki’ moe ‘tapu,’ ‘aia koe ‘lahi’ he ‘‘otua.’

 [15] Matahangale – ‘Oku tu’u ‘ae ‘hangale’ he tu’aliku ‘i Hihifo, ‘o ‘iloa ai koe Matahangale ‘i Tonga’eiki, Tongatapu pē Tongalahi.

 [16] Fonongatoa – ‘Oku ‘uhinga ki Hunga.

 [17 Lepuhā – ‘Oku ‘iloa koe mana’ia talavou mohu mo hulu ‘o Leimātua, ‘o hangē ko ‘ene felave’i moe ‘Kakana ‘ae Tangane,’ ‘Lepoaki ‘i Veisiale,’ ‘Hopo’anga ‘ae La’ā,’ ‘Hila ki Tapana,’ ‘‘Aho Kaifonu Kae Māvae Lua,’ ‘Lau Kafo Kae Lau Taumu’a,’ ‘Viku ē Malo ‘o ‘Āfitu mo Lakepa,’ moe ‘Fine Tangiloi ‘i ‘Utumalama.’

Koe ki’i fakamatala, kinikini, moe huluhulu nounou

 ‘Oku matamata mo ngalingali na’e fakafatu, fakafa’u, ‘ae ta’anga fakana’ana’a (moe fakalatalata, fakamohemohe, moe laumātanga) mālie mo’oni ko ‘eni “Koe Fakana’ana’a ‘ae Fānau ‘a ‘Ulukālala” ‘ehe punake Vava‘u ta’e’iloa he konga kimui ‘oe senituli 18 pē konga kimu’a ‘oe 19. ‘Oku ‘uhinga ‘ae ‘fakana’ana’a’ koe ‘fakalatalata’ mo ‘fakamohemohe’ ha tama ‘oku tatangi koe ta’elata, ‘o ‘uhinga koe feingavale ke tuku ‘ene tangi kae lata. ‘Oku pehē ‘ae ‘fakamohemohe’ ke mohe ha tama ‘oku tatangi koe ‘fiemohea’ (koe ‘fakanonga’ moe ‘fakafiemālie’).

 ‘Oku ‘asi lelei ‘eni hono fakalatalata ‘ae fānau ‘a ‘Ulukālala hono ‘ave ki Tonga’eiki, Tongatapu pē Tongalahi, ‘o nau tatangi he’enau ta’elata koe ‘ofa moe manatu kihe faka’ofo’ofa moe fakalata ‘o Vava’u, ‘aia ‘oku talanoa kiai ‘ae maau he’ene ta’anga, ‘o fakatoulōua pē ‘a ‘Utavava’u moe ‘Otumotulalo. ‘Oku hoko ia kene fakana’ana’a ‘enau tatangi mo fakalatalata ‘enau nonofo ‘i Tonga’eiki, Tongatapu pē Tongalahi mo manatu he’enau fakakaukau moe ongo ki Vava’u koe faito’o to’o-mo-tafi kihe mafasia ‘ae ‘atamai moe loto.

‘Oku ngāue’aki lelei ‘ehe punake kakato Vava’ulahi ta’e’iloa ni ‘ae heliaki, koe me’angāue faka’aati mo fakalitilesā he funga ‘oe laumātanga, lau’atamai moe lauloto, ‘o ‘lea kihe me’a ‘e taha kae ‘uhinga kihe me’a ‘e taha,’ ‘aia koe heliaki fkafetongiaki (malū moe folau), heliaki fakafekauaki (Matahangale mo Hihifo), moe heliaki fakafefonuaki (la’ā mo Lepuhā). ‘Oku pehē tofu hono teuteu mo fakateunga ‘e natula ‘a Vava’ulahi (lahi he to’a moe māfana) talu mei tuai, koe matapā ‘o Palataisi moe ‘Īteni ‘oe ‘Otu Kaveinga, he ta’anga mālie ‘ae punake kakato ko Feke Tutu’ila.

 Hūfanga-He-Ako-Moe-Lotu Dr ‘Ōkusitino Māhina, Palōfesa He Filosofī, ‘Ātolopolosī moe ‘Aati, Vava’u Academy & Marsden Research Vā Moana Research Cluster, AUT University