Faka’ilo e toko 4 fekau'aki mo e kole Paasipooti ngaue'aki Tohi Ta'u Loi Featured
Nuku’alofa, 30 ‘Okatopa 2015. Kuo faka’ilo toko 4 Tonga ki he liliu kākā’i mo e tohinima loi (forgery) mo e ngaahi hia fekau’aki kehe pe makatu’unga ‘i ha lāunga na’e fakahoko feka’uaki moe kole ke ma’u paassipooti pea na’e kau mai ai ‘a e tohi ta’u loi.
Na’e fakahā mei he Tokoni Komisiona Polisi ‘Unga Fa’aoa na’e fakahoko ange ha launga ko’eni mei he Va’a ‘Imikuleisoni ‘a Tonga ‘i he konga kimu’a ‘o e mahina ko ‘Okatopa pea na’e fakahoko ai ‘a e fakatotolo ‘a e kau Polisi fekau’aki mo e lāunga ni.
Ko e lāunga ko’eni fakatatau ki he fakamatala mei he Potungāue Polisi ‘oku fekau’aki tonu ia moha kole passipooti Tonga ‘o hangē koe founga anga maheni ka ‘oku fekau’aki tonu moha tokotaha muli ka ‘oku ne ma’u ha tohi ta’u (birth certificate) loi .
Ko e toko 4 ko’eni ‘oku faka’ilo ‘oku faka’ilo ia ki he tohinima loi moe liliu kākā’i, ngāue kākā ‘aki ha ngaahi pepa ‘oku fakapapau’i ‘oku loi mo hono ngaue’aki ta’e fakalao ‘aki ha mafai ke ma’u mai mo e hono fakafe’atunga’i ‘a e fakamaau totonu.
Kuo fakahoko ‘a e faka’ilo ko ‘eni pea ‘oku ‘amanaki ke hā ‘a e kau faka’iloa ‘i he Fakamaau’anga Polisi ‘i he ‘aho Mōnite 9 ‘o Tīsema 2015.
1 comment
-
Fakamalo atu kihe ngaue totoivi mo faitonunga si'i kau polisi hono fakatotolo'i e ngaue kaka moe tohinima loi si'i toko fa ni,kae fefe ala fo'i kaka mata 'a'a 'a e minisita infrastructure moe hoa moe foha he fu'u pa'anga 'ae fonua.Koe fifili ia 'a e motu'a ni koe lao 'o Tonga 'oku 'uhinga pe nai ia ki ha'a ma'ulalo moe kainanga 'o e fonua kae faifaioteliha pe minisita ia.