'Ikai Tali Fakamaau'anga Lahi Tangi 'a e Nusipepa Kele'a Featured
Nuku’alofa, 8 Sepitema 2015. Na’e ‘ikai tali ‘e he Tu’i Fakamaau Lahi Owen Paulsen ‘i he Fakamaau’anga Lahi ‘i he ‘aho 1 ‘o Sepitema ‘a e Tangi ‘a e Nusipepa Kele’a, Faipulusi Laucala Pohiva mo e ‘Etita ‘o e Nusipepa ni ‘i he taimi koia Mateni Tapueluelu fekau’aki mo e hopo lau’i kovi’i ‘i he vaha’a ‘o e kau Faka’iloa mo e ‘Eiki Tokoni Palēmia Malōlō mo Minisitā Malōlō ki he Ngaahi Ngāue Lalahi Samiu Kuita Vaipulu.
Ko e hopo ‘eni na’e fakahoko ‘i he māhina ko Sune ta’u 2012 ‘a ia na’e tu’utu’uni ai ‘e he Fakamaau Polisi ko Paula Tatafu ‘i he Fakamaau’anga Polisi ke mo’ua pa’anga ‘e $10,000 ‘a e kau Faka’iloa pea totongi mo e ngaahi fakamole kehe ‘a ia na’e fe’unga mo e pa’anga ‘e $5,384.50.
Ko e mo’ua ‘eni ‘o makatu’unga ‘i hono lau’ikovi’i ‘e he kau Faka’iloa ‘a Vaipulu ‘i he ‘atikolo na’e hā he Nusipepa Kele’a ‘o e ‘aho 16 ‘o Sanuali 2012 ‘o ‘ulu’i tohi ‘aki ‘oku ngāuehala ‘aki ‘e Nuku mo Vaipulu ‘a e pa’anga nō 80 miliona ki hono tanu ‘o e ngaahi hala. Na’e kau foki ai mo hono fakahā 'i he 'atikolo ko'eni ‘oku ‘i ai ‘a e fu’u maka ‘o Vaipulu mo Lord Nuku ‘oku fakahoko ‘aki ‘a e ngāue ko’eni.
Na’e hā ‘i he tu’utu’uni ‘a e Tu’i Fakamaau Lahi ‘a ‘ene fakatonuhia’i ‘a e tu’utu’uni ‘a e Fakamaau’anga Polisi pea ne fakahā ko e tukuaki’i mamafa mo hala ‘eni ‘o fakatatau ki he ngaahi fakamo’oni na’e fakahoko ‘e Vaipulu ki he Fakamaau’anga Polisi. Na’e tangi foki heni ‘a e kau Faka’iloa ki he Fakamaau’anga Lahi ‘o fakahoko ai ‘a e tu’utu’uni ko’eni 'i he Fakamaau'anga Lahi 'a e fonua.
‘Oku hā mahino pe foki ‘i he konga ‘o e tu’utu’uni ko’eni ‘a e Tu’i Fakamaau Lahi ‘a e ‘ikai fakapotopoto ‘a e ‘Etita Mateni Tapueluelu ‘i he’ene tohi ‘a e ‘atikolo ko’eni ‘o ‘ikai tomu’a fakahoko ha fakatotolo ki he mo’oni ‘o e talanoa ta’e fakapotopoto mo ta’e’ofa ko’eni.
Na’e pehē foki ‘e Tapueluelu ki he Fakamaau'anga ko e ma’u’anga fakamatala ki he ‘atikolo ko’eni ko e Tu’utu’uni Faka Fale Alea (Parliamentary Resolution) ka na’e ‘ikai foki ke malava kene ‘omai ha tatau ke poupou ki he’ene taukave pē ko e mo’oni ‘eni pe ko e loi. 'Oku mahino pe foki 'i he 'ikai malava ke ma'u 'a e tu'utu'uni ko'eni na'e 'ikai ha me'a pehe ni.
Na’e hoko atu ‘a e Tu’i Fakamaau Lahi ‘i he’ene tu’utu’uni ‘o fakamahino ‘oku ‘ikai malava ‘e he fa’ahi ‘a e kau Faka’iloa ke fakamo’oni’i ‘a e makatu’unga ‘o ‘enau tangi pea ‘oku mole heni ‘a e taimi mo e koloa ‘a e Fakamaau’anga ‘o mahino mei heni ko e ngaahi fakamole ‘e toe lahi ange.
‘Oku ‘oange foki ‘e he tu’utu’uni ko’eni ki he fa’ahi ‘a e Talatalaaki ke tanaki mai mo ‘enau fakamole ki he Tangi ko’eni ‘a ia ‘e toki aofangatuku ‘e he Fakamaau’anga Lahi ha mahu’inga kiai.
Na’e fakafofonga’i ‘a e kau Faka’iloa ‘e ‘Ofa Pouono pea William Edwards Jr. ma’a e Talatalaaki.
