Mo’ua ‘a e ‘Etita ‘Ofa Vatikani & Faipulusi Laucala Pohiva ‘O e Nusipepa Kele’a Ko e Ta’efaka’apa’apa Ki he Fakamaau’anga Featured
Nuku'alofa, 29 Siulai 2015. Na’e tu’utu’uni ‘e he Tu’i Fakamaau Lahi ‘i he Fakamaau’anga Lahi ‘i he faka’osinga ‘o e mahina ko Sune (25 Sune) ke mo’ua ‘a e ‘Etita ‘Ofa Vatikani mo e Faipulusi Laucala Pohiva ‘o e Nusipepa Kele’a ki he ta’efaka’apa’apa ki he Fakamaau’anga (Contempt of Court).
Na’e makatu’unga ‘a e tautea ko’eni ‘i he ‘atikolo na’e pulusi ‘e he Nusipepa Kele’a ‘i he ‘aho 2 ‘o Ma’asi ‘a ia na’e ‘ulu’i tohi ‘o pehe: ‘Fehu’ia pe ‘oku totonu nai ke fotunga pehe ni e tu’utu’uni hopo’.
Na’e tu’utu’uni ai ‘e he Tu’i Fakamaau Lahi Owen Paulsen ke mou’a $1,250 ‘a ‘Ofa Vatikani pea ke totongi ‘i loto he mahina ‘e 2 ka ‘ikai ‘e ngāue popula ki he mahina ‘e taha. Ko Laucala Pohiva leva kene totongi ‘a e $750 ‘i loto moia ‘i he mahina ‘e ua pea ka ‘ikai ‘e ngaue popula ki he mahina pe moia ‘e taha.
Na’e toe ‘oanga mo e ‘aho ‘e 42 ki he tokoua ko’eni ke faile ai ha’ana ta’efiemalie ki he tu’utu’uni ko’eni ‘o fakatatau ki he founga ngāue ‘a e Fakamaau’anga. ‘Ikai ngata ai ka ke toe pulusi tu’o ua ‘i he Nusipepa Kele’a ‘a e kole fakamolemole ki he Fakamaau’anga fekau’aki mo e ngāue pango ko’eni.
Na’e makatu’unga foki ‘a e tu’utu’uni ko’eni ‘a e Tu’i Fakamaau Lahi ‘i he ‘i he ‘atikolo na’e pulusi ‘i he Nusipepa Kele’a ‘a ia na’e fehu’ia ai ‘e he Nusipepa Kele’a ‘a e tu’utu’uni ‘a e Fakamaau Polisi ko Salesi Mafi fekau’aki mo e hopo ‘a e ongo Siaina ko Meilin Liu mo Fe Kaifeng Tian ‘a ia na’a na halaia ki he hia ko e feinga ke hū ta’efakalao atu ki Tu’apule’anga ha mokohunu ‘a ia ‘oku ‘ikai ke ngofua.
Na’e tautea ai ‘e Salesi Mafi ‘a Meilin Liu kene totongi ‘a e $1000 ki he hia ko hono ma’u mo e mokohunu lolotonga ‘oku tapui pea ko Tian na’e tautea ia kene totongi ‘a e $1000 pea ka ‘ikai ‘e ngaue pōpula mahina ‘e taha ki hono ma’u mo e mokohunu lolotonga ‘oku tapui mo e feinga ke hū atu ki Tu’a Pule’anga.
‘Oku mahu’inga foki ‘a e tu’unga falala’anga ‘o e Fakamaau’anga pea ‘oku tapu pe foki he lao hono fakahoko ha fa’ahinga tukuaki’i ‘ikai hano makatu’unga ‘a e Fakamaau’anga mo’ene ngaahi tu’utu’uni he ‘oku pelepelengesi foki ‘a e fatongia ‘o e Pule tolu ‘o e fonua ‘a ia koe Fakamaau’anga.
Ko Dr Harrison QC SC na’a ne fakafofonga’i ‘a e ongo faka’iloa pea ko e ‘Ateni Seniale Le’ole’o ‘Aminiasi Kefu na’a ne fakafofonga’i e faha’i ‘a e Talatalaaki.
1 comment
-
Ko e talu 'eku kamata poto he laukonga mo 'eku laukonga ai pe he mo'ua 'a e nusipepa ni, peau fa'a nofo 'o pehee, kau eni he ki'i pepa lotolahi pea 'oku sai 'enau ta'aki mai e ha mo e ha ke 'ilo kiai e kakai. Ka ko e taimi ni kou nofo 'o sio atu 'o faka'ofa'ia he'enau fa'ahinga ngaue 'oku fai, he kou tui ka ne nau fakamatala pe mo'oni, 'e sai pe ia, ka ku toe paki mai mo e loi, kenau 'ilo koaa ko e tanaki mala ia 'oku nau fai ki he'enau fanau. Kaikehe, fu'u ma'ama'a e tautea koena na'e tonu ke hiki hake ka 'ikai pea oo 'o ngaue popula he kuo 'ikai kenau kei 'ilo 'e kinautolu honau ngata'anga ...