Toloi hopo ni'ihi puke fekau'aki mo e faito'o konatapu 'i Vava'u ^Featured

Ko hono toloi 'eni kenau toe ha 'i he Fakamaau'anga Polisi 'i Neiafu 'i he 'aho 4 'o 'Okatopa 'o e mahina ni pe.

'Oku kau foki he ni'ihi ko'eni 'a e kau muli 'e toko tolu 'oku nau nofo 'i Houmalei 'i Vava'u  'a ia ko tangata'eiki Pilitania ko Ian Robin Cox ta'u 70 a pehe ki hono uaifi Brenda Cox ta'u 58 pehe ki he matapule 'Amelika ko Calvin Manuceau ta'u 25. 

'Oku kau ki ai mo e tokoua kehe ko Andrew Motuliki mei 'Utulangivaka mo Kapeni Tamo’ua of 'Utungake.

'Oku mahino mai koe ngaahi keisi ko'eni kotoa 'oku fakatatali ke fakahoko hano fakahu atu ki he Fakamaau'anga Lahi ke fakahoko 'a e hopo 'i he malumalu 'o e mafai koia.

Ko e toenga 'o e kau faka'iloa 'oku tauhi kinautolu 'i he malumalu 'o e Potungaue Polisi pea 'e toki ui 'enau ngaahi hopo 'i he 'aho 23 'o 'Aokosi 'i he Fakamaau'anga Polisi pe 'i Neiafu.

Koe  toko 15 foki kuo puke pea faka'ilo fekau'aki mo e faito'o konatapu ko'eni 'a ia koe kokeini kalasi A pea koe toko 12 'i Vava'u pea mo e toko 3 kuo puke 'i Tontatapu.

'Oku laka hake he kilokalami 'e 14 kuo puke 'e he kau polisi pea 'oku fakafuofua ke laka hake 'i he pa'anga 'e 5 miliona hono mahu'inga.

'Oku kehekehe pe foki 'a e ngaahi faka'ilo 'oku fakahoko ki he ni'ihi ko'eni 'o kau ai hono fetuku ta'efakalao, tauhi mo pule'i pehe ki he fakamatala loi 'i hono faka'eke 'e he ma'u mafai.

Ko e faito'o konatapu ko'eni 'oku tauhi 'e he kau polisi hili ia hono ma'u he ngaahi matafanga 'o e hahake 'o Vava'u pea 'oku hoko ai 'a e hoha'a lahi 'a e fonua ki he fakautuutu hono puke 'a e faito'o konatapu 'i he fonua ni.