Mo’ua $249,442 Mateni mo Laucala Tapueluelu, Solomone Palu mo e Nusipepa Kele’a Featured
Nuku’alofa 6 Mē. Kuo ‘ikai tali ‘e he Fakamaau Lahi Micheal Scott 'i ha tala tu'utu'uni ‘i he Fakamaau’anga Lahi ‘i he pongipongi 'o e 'aho ni ‘a e Tangi ‘a Solomone Palu, Mateni Tapueluelu (‘Etita), Laucala Tapueluelu (Faipulusi) mo e Nusipepa Kele’a.
Ko e tangi foki ‘eni fekau’aki mo e tu’utu’uni ‘a e Fakamaau Polisi ko Paula Tatafu ‘i he Fakamaau’anga Polisi ‘i he ta’u 2013 ke mo’ua ‘a e kau faka’iloa pea totongi mo e maumau ki he laui’i kovi’i mo hono takihala’i ‘a e kakai ‘i ha tohi ki he ‘Etita ‘a Solomone Palu na’e pulusi ‘e he Nusiepa Kele’a ‘i he ta’u 2013.
Na’e ‘eke foki ‘e he kau Talatalaaki ‘e toko 7 ‘a ia ko e kau memipa ‘eni ‘o e Kapineti ‘i he Pule’anga ‘o Tu’ivakanō ‘a e taki pa’anga ‘e $10,000 ki he kau faka’iloa. Ko e ngata’anga pe foki ‘eni ‘o e tautea ‘e foaki he mafai ‘o e Fakamaau’anga Polisi pea na’e tali ‘a e ‘eke ko’eni ‘i he Fakamaau’anga Polisi ‘i Siulai 2013. Na'e pau ai ke tu'utu'uni ke totongi 'a e maumau tukukehe ange ‘a e ngaahi totongi makehe mo e ngaahi fakamole ‘a ia na'e tananaki ‘o a’u hono fakafuofua ki he pa’anga ‘e $249,442 (Matangitonga, 14 Sune 2013).
Ko e tohi foki ‘eni ‘a Solomone Palu ki he ‘Etita ‘o tukuhifo mo laui'ikovi'i ‘a e Palēmia ‘o e ‘aho koia Lord Tu’ivakanō mo e Kau Minisitā ‘e toko 6 ‘a ia na’e kau kiai ‘a William Clive Edwards, Dr. ‘Ana Taufe’ulungaki, Dr. Viliami Uasike Latu, Fe’ao Vakatā, Sione Sangster Saulala mo Samiu Kuita Vaipulu.
Ko e tohi ‘a Solomone Palu ‘o tukuaki’i ‘a e Kau Memipa ‘o e Kapineti ‘oku nau ngāue hala’aki honau mafai pea nau toe ngauehala’aki ‘a e pa’anga ‘a e fonua ka na'e 'ikai malava ke fakamo'oni 'eni 'e he fa'ahi 'a e kau Faka'iloa 'i he hopo ko'eni. Na’e fakalea foki ‘a e tohi ni ‘i he founga ta'eufi mo ‘ikai fakamatāpule pea na’e tupu ai hono fakahoko ‘a e fakatonutonu ko’eni. Na’e loea ‘aki foki ‘e he kau Talataaki ‘a William Clive Edwards Sr. pea na’e fakafofonga’i ‘e Samuela ‘Akilisi Pohiva ‘a Solomone Palu mo e tafa’aki ‘a e kau Faka’iloa.
‘Oku mahino foki koe tu’utu’uni ko’eni ‘a e Fakamaau’anga Lahi ‘i he pongipongi ‘o e ‘aho ni ‘oku 'oku kei tu'uma'u pea 'a e mo'ua 'i he Fakamaau'anga Polisi hange koia 'oku 'oatu 'i 'olunga pea 'e toe tanaki atu kiai mo e fakamole ‘a e kau Talatalaaki pehe ki he ngaahi fakamole kehe ‘a ia ‘e hiki hake ai pe ‘a mo’ua ‘o e kau faka’iloa ki ha fika ‘oku toe lahi ange. Na’e fakafofonga’i foki ‘a e tafa’aki ‘a e Talatalaaki he hopo Tangi ko’eni ‘e William Edwards Jr. pea Siosifa Tu'utafaiva ma'a e kau Faka'iloa.
'E toki fakaikiiki atu 'a mui ange 'a e tu'utu'uni 'o e hopo ni.
5 comments
-
Pasiaka
'Oku 'ikai foki ko Solomone Palu ia 'o faitohi, ko 'Akilisi ia oku faitohi o ngaue'aki e 'u hingoa kehekehe, he ku fa'a siotonu pe ai e kau kalake ia 'a e Fale Alea. Pea ko e mo'ua ia koena 'o Solomone ko e Kele'a pe ia tenau totongi he ko Solomone ia ko hono body mo hono hingoa 'oku hire ia 'e he Kele'a ... body for hire kiaiiii -
'Oku fiefia foki e Kele'a ia mo 'enau timi he taimi 'oku nau mo'ua ai he 'oku kau lelei ia ki honau 'imisi mo honau kau muimui 'o pehe ko e kakai ta'eufi kinautolu mo lotolahi. Pea 'e lava pe ketau pehee ko e kaume'a ni 'oku nau polepole 'aki e kovi, loi mo e palakuu ee.
-
Ko e toki si'i mahino 'eni kia Solomone Palu koe taimi 'oku tau 'aka ai e fanga laione pea 'une ke mama'o e kumaa he 'e lavea lahi. Sai pe 'a Mateni ia 'oku anga pe ia ki he mo'ua 'ikai totongi.
-
Tau ongo'i kotoa pe fu'u totongi pa'anga lahi ko 'eni, ka 'e toe fefee'i koe tu'utu'uni ia 'a e Fakamaau'anga mo e Lao 'o Tonga. Sai pe he koe Fakamaau Tangi 'ena 'e toe vilo mai he ta'u ni pe, pea foki mai pe 'a Harrison 'o toe 'aliaki na'a holoki hifo ai e mo'ua. 'E tokoni moe folau ki 'Iulope 'a e Loea 'a Solomone Palu, 'Akilisi he koe per diem lahi ia 'e ma'u mei ai, ke tokoni ki hono tataa e mo'ua 'o Palu. Sai pe 'a Mateni ia he'e huu ki Fale Alea 'o tataa mei ai ha konga e mo'ua, kae 'ofa mai aa Palu 'o tuku e fa'a faitohi lau'ikovi noa'ia, ta'epoini mo ta'eufi, kae fai aa ha ngaue 'oku 'aonga ange.
-
Koe iku'anga ena 'oe me'a koe ngutulau moe taaufehi'a, koe mo'ua pe kihe tu'u e 'ulu. 'Alu e PM ia ki Lonitoni koe poupou kihe human rights 'a West Papua kae laiki e human rights ia 'ae kakai Tonga ke ta'e'aonga. Pea tu'u hake 'o talaki 'i mamani 'oku poupou kakato a Tonga ki West Papua he na'e fai ha'ane savea ke ne 'ilo e loto 'oe kakai. 'Ikai pe ke fiu ia he ngalivale 'ene lea na'e fai he UN, pea fielau hono tapuni'i atu 'ehe fakafofonga taukei mo poto mei 'Initonisia. Kau e fo'i folau ko eni ki Lonitoni he fakamole noa'ia mo maumau taimi ki he pule'anga. Na'e mei 'aonga ange ke 'omai e pa'anga folau ko ia ke hire mai'aki ha vaka uta suka he'ene 'alu noa'ia holo. Kaekehe ka kuo ne toki mahino'i foki e 'uhinga na'e fa'a folau holo ai e kau palemia moe kau minisita 'oe ngaahi pule'anga kimu'a, ta koe me'a 'oku ifo .... ifo ki he sino pea toe ifo kihe ualeti e. ..... malie human rights champion.