'Aka ‘e Lalotonga Si‘isi‘i, 3-0, Timi Soka ‘a Tonga Lahi Featured
Fa'ao 'e he Tokotaha Va'inga Tonga e Pulu mei he Lalotonga
'Aka ‘e Lalotonga Si‘isi‘i, 3-0, Timi Soka ‘a Tonga Lahi
(Fa‘utohi ‘a Sione A. Mokofisi)
LOTO-TONGA SOKA CENTER, ‘ATELE, TONGATAPU: Na‘e hanga ‘e he ki‘i fonua si‘isi‘i ko Lalotonga ‘o fakamamahi‘i ‘a Tonga, 3-0, ‘i he fe‘auhi soka ‘a e FIFA (Federation of International Football Association) ‘aneafi, Mōnite, Aokosi 31, 2015.
Ko e ‘uluaki takai eni ‘a e kulupu iiki taha ‘i ‘Ōseniá ki he Ipu ‘a Māmaní ki Moscow, Lūsia, ‘i he 2018. ‘Oku toko 15,000 pe ‘a e tokolahi ‘o Lalotongá, pea ‘oku toko 105,000 ‘a Tonga.
Na‘e tui-‘ulu‘i ‘e he fika #11 ‘a Lalotongá, Taylor Saghabi, ‘enau ‘aka tuliki ‘i he ‘uluaki kongá ke fakaava-‘aki ka e ‘ohovale ‘a e kau va‘inga Tongá, mo ‘enau kau faiakó.
Pea ne ‘osi pe miniti ‘e nima (5) na‘e toe ‘akahi Taylor Saghabi, ‘a e kai hono uá. Ko e fakaofo atu ‘a e faka‘ohovale ‘i he toe tata‘o atu ‘a e ‘aká ni. Na‘e fakamatala foki ‘e he faiako ‘a Tongá, Timote Mōleni, na‘e ‘osi maau ‘enau teuteú. Na‘a ne faka‘amu kenau mālohi ke hoko ko ha faka‘a‘ai ke tupulekina ‘a e soká ‘i Tongá.
Na‘e ‘aka fakahū hala ‘a Tonga ‘e tolu(3) ‘i he ‘uluaki kongá, pea ‘aka ‘e tolu (3) ‘i he tu‘u hono uá. Pea ‘aka hala ‘a Lalotonga taki tolu (3) ‘i he ongo haafé, ka na‘e hū foki ‘a e tolu (3) ‘a nautolu.
TU’U HONO UÁ
Na‘e faka‘amu ‘a e kau poupou mamata ‘a Tongá tenau tuetué atu mei tu‘á pea ‘e lokomo‘ui a e kau va‘ingá. Tautefito ki he tu‘u hono uá ‘i he kei 0-2 pe ‘a e kaí. Ka na‘e toe ‘akai ‘e he fika #11, Taylor Saghabi, ‘o Lalotongá ‘a e kai hono tolú (hat trick) pea hangé na‘e puhi‘i ‘e ha matangi afá ‘a e fie va‘inga ‘a e kau tau Tongá.
Ko e mālohi‘anga ‘o e kau va‘inga Laotongá ko ‘enau ‘aka pāpāsi nounou, ka e feinga ‘a Tonga kenau ‘aka lōloa. ‘I hono tali mai ‘e he kau malu‘i koló ‘a Lalotongá, pea nau pāpāasi holo pe kinautolu pea hoko ai mo ‘enau ‘aka ‘i he koló.
Ko e ‘uluaki mālohi eni ‘a Lalotonga ‘i ha fe‘auhi FIFA ki he Ipu ‘a Māmaní.
Na‘e mālohi ‘a Ha‘amoa Lahi, 3-2, ‘i Ha‘amoa ‘Amelika ‘i he tau hono uá. Ko e kaí Ha‘amoa Lahí na‘e 3-0 ‘i he mālōlō. Pangō na‘e nounou e taimi ke tuli kai ai ‘a Ha‘amoa ‘Amelika.
‘E fetaulaki ‘a Tonga mo Ha‘amoa ‘Amelika ‘apongipongi, Pulelulu, ka e fepaki ‘a e ongo fonua na‘a na mālohí, Ha‘amoa Lahi pea mo Lalotongá. Pea ko e ‘aho Falaité ‘e kakato ‘a e takai lōpiní ‘i he tau ‘a Tonga mo Ha‘amoa ‘Ameliká, ka e fepaki ‘a Ha‘amoa Lahi pea mo Lalotonga.
