Metali Koula ‘e 3 ‘Amini Fonua Ma’a Tonga He Kakau Featured
'Amini Fonua Lolotonga Lolotonga Foaki Kiai 'a e Metali Koula
Nuku'alofa, 11 Siulai 2015. Ko e ongoongo fakafiefia ia ki he fonua hono ikuna ‘e he talavou Tonga koia ko ‘Amini Fonua ‘a e metali koula ‘e 3 ma’a Tonga ‘i he sipoti kakau 'i he fe'auhi sipoti 'a e Pasifiki Saute 'oku lolotonga fakahoko ki Port Moresby 'i Papua Niukini.
Na’e ikuna foki ‘e ‘Amini Fonua ‘a e fe’auhi kakau ‘i he fa’ahinga kakau ko e Breaststroke ‘a ia na’a ne ikuna ai ‘a e mita ‘e 50, 100, mo e 200.
Na’e fakahā foki ‘e ‘Amini ‘i hano faka’eke’eke ia ‘e he kau faiongoongo ‘a e South Pacific Games na’a ne kau atu pe ki he fe’auhi ‘i he mita ‘e 200 ko’ene fiefia pe ‘a ‘ana he koe lova faka’osi pe ia ‘i he fa’ahinga kakau ko’eni kae faka’ohovale ‘ene ma’u ‘a e metali koula pea ‘oku lolotonga felangaaki tupu mei he fe’auhi ko’eni.
Ko ‘Amini foki ko ‘ene ‘iveni pau pe ‘a e mita ‘e 50 mo e 100 ka ‘oku fakafiefia ‘a ‘ene toe tanaki mai mo e koula kehe ‘e taha ki he tepile metali ‘a Tonga. Na’e ikuna foki ‘e ‘Amini ‘a e mita ‘e 50 ‘aki ha sekoni ‘e 28.20, Miniti ‘e 1:02.99 ki he mita ‘e 100 pea Miniti 2 2:20.27 ki he mita ‘e 200.
Oku a’u mai ki he ‘aho ni ‘oku kei tu’uma’u ai pe ‘a Tonga ‘i he fika 10 ‘i he tepile metali ‘aki ‘a e metali ‘e 4 ‘a ia ko e koula ‘e 3 mo e polonise ‘e taha. Ko e metali koula ‘e tolu ko e ikuna kotoa ia ‘a ‘Amini Fonua ‘i he sipoti kakau.
