Sinaki e Loeá ki he ‘Iunioni ‘Akapulu ‘a Māmaní: “Ta‘ofi Lavea ki he ‘Ulú” Featured
Sinaki e Loeá ki he ‘Iunioni ‘Akapulu ‘a Māmaní: “Ta‘ofi Lavea ki he ‘Ulú”
Lawyer for ruggers warns: Increase in dementia epidemic by way of head injuries
Fa‘u ‘a Sione Ake Mokofisi –‘ētita tu‘apule‘anga
Konga I
LONDON, England – Kuo ‘alu ke tokolahi ‘a e kau ‘akapulu ‘iunioni polofesinale mālōlō kuo nau fokoutua ‘i he mahaki tō (epidemic) mei he lavea ki he ‘ulú: maumau ai ‘enau manatú; mafuli honau angamahení; pea holo mo e faka‘uhingá ‘a honau ‘atamaí (dementia).
Ko e pangó, ‘oku toe ‘ā‘āsili e maumau‘i ‘e he mahakí ni ‘a e ‘atamaí ‘i he ‘enau motu‘a angé. Tokolahi e kau va‘inga mālōlō ‘i honau ta‘u 40 ‘e ‘ikai kenau toe lava ‘o ngāue ‘i honau ta‘u 50 ‘o faihake. ‘I he ‘etau masiva lea ‘i he lea Tongá, ‘oku tau ui ‘a e “dementia” ko e “vale” pe ko e “faha” ko e lea manuki‘i. Teu ngāue ‘aki ‘a e liliu fo‘i lea Tongá – “timenisia”.
Na‘e fakatahataha ‘a e kau ‘akapulu mālōlō ‘e toko 8 (Dec. 2020) ke ‘ahi ‘ahi faka‘ilo ‘eke‘i-pa‘anga ‘a e ngaahi ‘iunioni ‘akapulu (UK mo Aealani) na‘á nau va‘inga aí, pea ‘e a‘u ki he ‘Iunioni ‘Akapulu ‘a Māmaní (World Rugby Union). Kā kuo toko 110 ‘a e tokolahí kuo nau fetu‘utakimai, lau ia ‘a ‘enau loeá ko Richard Boardman. Na‘e fakahā ia ‘i he lipooti ‘a Jamie Gardner, ‘o e Press Association ‘o e UK mo Aealani.
Kau Va‘inga Mālōlō ‘Osi Fokoutuá “Timenisiá”
‘Oku takimu‘a ‘a e foueti mālōlō ‘a e Laione ‘a Ingilaní mo Aelaní, Steven Thompson (2003 Ipu ‘a Māmani) ‘i he toko 8 ‘ahi‘ahí faka‘ilo ‘o e Rugby Union (Ingilaní); Welsh Rugby Union, mo e World Rugby Union. Ko ‘enau tukuaki‘i ‘enau fokoutua ‘i he timenisiá mei he lavea ki honau ‘ulú ‘i he ngaahi ta‘ulahi na‘á nau va‘inga polofesinolo aí.
“‘Oku mau tui ko e 50% ‘o e kau va‘inga polofesinale mālōlō tenau iku ki he maumau ‘o e ngaahi neave ‘o e sinó ‘i honau ngaahi ta‘u mālōlō,” lau ‘a loea Richard Boardman. “Ka ‘oku fiema‘u ‘a e ngaahi liliu ki he lao ‘o e sipotí ke malu‘i ‘a e to‘utangata va‘inga ‘o e lolotongá mo e kaha‘ú foki.”
“‘Oku fakautuutu e lalahi ‘a e fepaki ‘a e kau va‘ingá, ko e oma-ange ‘a e va‘ingá, mo e mamafa-ange ‘o e fua-kavenga ‘a e kau va‘ingá,” hokoatu ‘a loea Boardman. “Pea ‘e ‘ikai faka-‘ikai‘i ha hoko ‘a e maumau kia Steve Thompson (Laione huka), Alix Popham (Uēlesi Fika 8), mo Michael Lipman (Laione Fika 7) ki ha taha kehe. Ko kinautolu toko 3 pē kuo fakahingoa mai mei he toko 8, kuo fakapapau‘i ‘a ‘enau fokoutua ‘i he timenisiá.
‘Ikai Kei Manatu‘i ‘e Thompson Ta‘u ‘e 17
Ko e mahaki foki eni na‘e pekia ai ‘a e tangata ‘akapulu soka mālōlō ko Jeff Astle, mei he ‘ene fe‘auhi fuhuletá. Pea fakapapau‘i ai ‘i he mo‘ua ‘a e NFL ‘o e ‘Akapulu faka-‘Ameliká ki he $140-miliona ma‘á e kau va‘inga ‘e toko 4,500 ‘i he 2013. Ko e me‘a tatau eni ‘oku ‘eke‘i ‘e he kau ‘akapulu ‘iunioní.
Kuo a‘u ‘o mole kotoa ‘a e manatú mei he ‘atamai ‘o Steven Thompson. Kuo ‘ikai kei manatu‘i ‘e ia ‘a e hingoa ‘a hono hoá – Stephanie, mo ‘ene fānaú ‘e toko 4. Taimi lahi ‘oku toe fakamanatu mai ‘e Stephenie mo ‘ene fānaú ‘a e ngaahi me‘a maheni kia Steven.
“Ko Steph au,” ka e hili pe ia kuo ‘ikai toe manatu‘i ‘e Steven ‘a e hinoga ‘o Stephanie.
‘Oku ‘ikai foki toe manatu‘i ‘e ia ‘enau ikuna‘i ‘a e Ipu ‘a Māmaní ‘i ‘Aositelēliá, 2003. ‘Okú ne mata vitiō kā ‘oku ‘ikai manatu‘i ‘e ia na‘e kau he ngaahi fe‘auhí. ‘Oku mamata tonu ki he ‘ene ngaahi lele mo e tali-tangatá, ka ‘oku ‘ikai tui ia na‘e ‘i ‘Aositelēliá.
Pea mole ai mo ha‘á ne manatu melie ki he ta‘u ‘e 17 na‘e va‘inga polofesinale ‘iunuoni aí.
Kuo fakahā ‘e Steven Johnson (to‘omata‘u), ko e huka mālōlō ‘a e Laioné ‘a Ingilaní, ‘oku ‘ikai ke kei manatu‘i ‘e ia ‘enau tua ki ‘Aositelēliá mo ‘enau ikuna‘i ‘a e Ipu-‘a-Māmaní ‘i he 2003. (Photo: Getty Images).
(S.A.Mokofisi writes and does research on significant topics on Polynesian and Pacific Islands peoples. He is a graduate of Mesa College-Arizona; BYU-Hawaii; U of Phoenix-Utah; and a doctoral candidate of U of Phoenix-Arizona where he earned the AA, BS, and MBA consecutively. He is currently writing his doctoral dissertation on “Investigating how Tonga can develop a sustainable Remittance industry.”)
