Manakoa fe’auhi ‘Akapulu ‘oku lolotonga lele ‘i Vava’u ^Featured

Ko e tunameni foki ko’eni ‘oku fakalele ia ‘e PTOA Global ‘a ia ko e taha pe ia ‘o e ngaahi kulupu kuo mapaki mei he PTOA pea ‘oku nau fakalele ‘a e fe’auhi ko’eni 'o kau atu kiai 'a e kolo 'e 18 mo'enau takitaha timi.

Fakatatau ki he fakamatala mei he ni’ihi kuo faka’eke’eke ‘e he ongoongo ni ‘oku nau pehe ‘ikai kenau sio ki he fe’auhi ko’eni ‘aki ha matasio’ata faka-politikale pea neongo ‘oku mahino pe ko e konga ia hono fakahoko ‘o e fe’auhi ni koe taumu’a ki he teu fili Fale Alea ‘o e ta’u ni ka 'oku kau mai 'a e kakai 'i he laumalie 'o e manako sipoti.

‘Oku nau lau ‘enautolu ‘a e faingamalie ko’eni ke fakakake ai ‘a e maa’imoa ni ‘i Vava’u pea ke teke mo pouaki ‘a e taleniti ‘o e fanau manako ‘akapulu mo honau taleniti.

‘Oku ‘ikai ngata ai ka ‘oku ne ‘omai ‘a e laumalie ‘o e fiefia ki he ngaahi kolo mo’enau ngaahi timi pea ‘oku hū mai he taimi tonu lolotonga ‘a e fekuki ‘a e fonua mo e ngaahi fakataputapui.

‘Oku mahino mei he tunameni ko’eni ‘oku makatu’unga hono fu’u manakoa mo hono poupoua ko e fu’u fuoloa ‘a e ‘ikai ke lele pe fakahoko ha tunameni ‘akapulu ‘i he Vahefonua Vava’u ‘i ha ta’u lahi.

‘Oku ‘ikai lau kiai ko e hoko mai ‘a e Covid-19 mo hono ngaahi fakataputapui mo e ‘ikai toe fu’u ‘i ai ha me’a ia ‘a e kakai ke fakahoko he kuo mate ‘a e takimamata pea ta’ofi mo e fefolau’aki fakavaha’a-Pule’anga pea ‘oku hoko ‘a e tunameni ko ‘eni ke ‘amanaki lelei ‘a e kakai ‘o Vava’u koha fakataha’anga fakafonua mo fakafiefia ‘eni.

‘Oku malie foki ‘a e fe’auhi koe toe kau mai ‘a e kau va’inga mei Tongatapu pea ‘oku hoko ‘a e fe’au’auhi ‘a e ngaahi timi ke toe malie ange ai ‘a e fe’auhi pea ‘oku tokoni ia ki hono faka’ai’ai ‘a e taleniti ‘o e fanau ‘i Vava’u.

‘I he tafa’aki faka’ikonomika ‘oku ‘i ai ‘a e seniti ‘oku ma’u ‘e he kakai ‘o Vava’u mei hono fakatau atu ‘enau ngaahi koloa tautautefito ki he me’aki mo e inu tukukehe ange ‘a e tokoni mai ‘a e kainga Vava’u ‘i muli ki he’enau takitaha timi pea ‘oku tafe mai ai ‘a eseniti ki he Vahefonua pea ‘oku fakatokanga’i ngofua ‘eni.

‘Oku hiki mai foki ‘a e fe’auhi ni ‘o fakahoko ki he mala’e ‘akapulu fakakolo ‘o Leimatu’a hili ha tu’utu’uni mei he Pule’anga mo e Potungaue Mo’ui ke ta’ofi pea ‘oku kau pe kiai mo e ngaahi isiū mei he ngaahi ‘apiako ‘oku ‘onautolu ‘a e ngaahi mala’e.

‘Oku faka’ohovale ‘i he taimi tatau ‘a e ngāue kuo fakahoko ki hono fakalelei ‘a e Mala’e ‘Akapulu Fangatongo ‘a ia ‘oku toe kau lelei pe mo ia ki he Vahefonua fakalukufua.

‘Oku ‘amanaki foki ke fainolo ‘a e fe’auhi ni ki he mahina ko Sune.