Kamata kalapu LA, Dallas, ka e tatali Kanaloa Hawaii ‘i he Major League Rugby ‘Amelika & Kānatá Featured
Kuo fakamo‘oni ta‘u-ua ‘a Chris Robshaw, Kapiteni mālōlō ‘a 'Ingilani, mo e San Diego Legion ‘o e MLRugby ki he 2021- 2022.
Fa‘u tohi ‘a Sione Ake Mokofisi
Las Vegas, Nevada: Kuo kau atu ‘a e kalapu ‘akapulu ‘iunioni fo‘ou e 2 ko e Los Angeles Giltinis mo e Dallas Jackals ki he teuteu kamata fo‘ou ‘a e North American Major League Rugby ‘i he 2021. Ko e pangó na‘e tōmui ke maau ‘a e kalapu ko e Hawaii Kanaloa kenau kamata fe‘auhi mo kinautolu.
Talu hono veuki ‘o ‘enau ta‘u va‘ingá 2020 ‘e he Koloná COVID-19 kuo mavahe atu ai ‘a e kalapu Colorado Raptors. Na‘e ‘uluaki hūmai ‘a e Raptors ‘i he 2018 ‘o nau kau ‘i he tefito‘i kalapu ‘e 7 ‘o e North American Major League Rugby, ‘a ia ‘oku kaumai ki ai ‘a e Toroto Arrows mei Kānatá.
Na‘e kaumai ‘a e kalapu fo‘ou ‘e 5 ‘i he 2019 ‘o ‘alu hake ki he kalapu ‘e 12 ‘o a‘umai ki he ta‘ú ni. Kā ko e ongoongo lelei eni ko hono tali ‘o e Kalapu LA Giltinis mo e Dallas Jackals ke toko 13 ‘osi hono fetongi ‘a e mole ‘o e Colorado Raptors. Ko e faka‘ilonga lelei ki he manakoa ‘o e MLRugby.
Teuteu‘i Kau Va‘inga ‘Ameliká & Kānatá
Na‘e e‘amai mei he fakamatala ‘a e Pule Kolo ‘o Glendale, Colorado, Linda Cassaday ‘a e ngaahi ‘uhinga kehe na‘e kau atu ki he mole ‘a e Raptors mei he Major League Rugby ‘i ‘Epeleli 10, 2020. ‘Oku mahino ‘oku nau tokanga ki he ngaahi fakamole mei he totongi tukuhau ‘a e kakai ‘e Glendale.
“‘Oku ‘oatu ‘a e talamonū mei he Raptors ki he kaha‘u ‘o e MLRugby,” lau ‘a Linda Cassaday. “Ka ko homau fatongia ‘uluakí ko e teuteu‘i ‘o e fānau ‘Ameliká kenau ‘aonga ki hono fakafofonga‘i ‘o e sipoti ‘akapulu ‘iunioní ‘i ‘Ameliká ni. Temau hokoatu ke teuteu‘i ‘a e fānau ‘Ameliká ‘i he va‘inga ‘akapulu ‘iunioní.”
Na‘á ne ‘ohake ai ‘a e mafuli ‘a e lao ‘o e MLRugby kau ki he tokolahi ‘o e kau va‘inga mei mulí. Ko hono mo‘oní foki ‘e tahá ko e tokosi‘i ‘a e matavai mo‘ui ‘o e kau va‘inga ‘Amelika mo Kānatá ko ‘enau manako ange ki he ‘Akapulu ‘Ameliká mo e ‘Akapulu Kānatá.
“Na‘e kamata ‘aki ‘a e toko 3 mei tu‘apule‘angá pea ‘alu hake ai ‘o toko 5, pea kuo a‘u eni ‘o toko 10,” hokoatu ia ‘a Linda Cassaday. “Ko e ola foki ia ‘o e feinga ‘a e ngaahi kalapu MLRugby kenau fe‘auhi ki he mamata ‘a e kau mata-va‘ingá. ‘Oku a‘upē ‘o toko 10 ‘a e kau va‘ingá mulí ka e toko 5 pē mei ‘Amelika, mo Kānatá lolotonga ‘a e tau kotoá.”
“Kā ‘oku ‘ikai ke fakalakalaka ai ‘a e va‘inga ‘a e tamaiki ‘Ameliká. Ko ia ‘i he fe‘auhi Ipu ‘a Māmaní (2019), na‘e ulungia kotoa ‘a e ngaahi tau ‘a e ‘Īkale ‘Ameliká: Pilitānia 45, USA 7; Falanisē 33, USA 9; Āsenitiná 45, USA 17; Tonga 31, USA 19.
Kau Va‘inga Tu‘ukimu‘a Mei Muli
Na‘e kau ‘a e All Blacks Nu‘usilá mālōlō ko Rene Ranger ‘i he kau muli na‘e ‘omai ‘e he Colorado Raptors. Ko e le‘okolo Pilitānia ko Ben Foden mo e senitā Falanisē ko Matthieu Bastareaud ki New York.
Ko e matatolu ‘Afilika Tonga ko Tendai Mtwarirá kuo ha‘u ki he Old Glory Rugby Club ‘i Washington D.C. Pea mo e hū-ua mei ‘Itali ko Josh Furno, pea mo e senitā All Blacks Ma‘a Nonu ki he San Diego Legion. Na‘e ulungia ‘a Legion ki he Seattle Seawolves ‘i he tauhau ‘o e 2019, pea na‘á nau taki ‘a e MLR ‘i he 2020 kimu‘a pea toki motuhi ‘e he Koloná Covid-19.
Pea kuo toe tānakimai ‘e he San Diego Legion ‘a e kapiteni mālōlō Pilitānia ko Chris Robshaw ki he 2021 mo e 2022. ‘I he lau ‘a e sea ‘o e Legion, Mr. Darren Gardner mei ‘Aositelēliá,‘oku nau langa‘i hake ‘a e kautaha faka-tu‘apule‘angá. Pea kuo pau kenau ‘omai ‘a e kau va‘inga kalasi-tu‘apule‘angá.
Hūmai Kalapu Fo‘ou Los Angeles, Dallas
Hoko mo e hūmai ‘a e pole mei he Kalapu LA Giltinis mo e Dallas Jackals ‘o tali ‘e he Major League Rugby, na‘e fakapapau‘i mai ia ‘e MLR Commissioner George Killebrew. Me‘a pangó kuo tōmui ‘a e mateuteu ‘a e Kalapu Kanaloa Hawaii Rugby ki he to‘u-ta‘u va‘inga 2021. Kaekehe, ‘oku fakahā ‘e Commissioner Killebrew ‘oku kei ‘atā pe ‘a e Kanaloa Hawaii Rugby kenau teuteu ki ha to‘u-tau ‘i he kaha‘ú.
Na ‘e tukuange ‘a e vaha‘a taimi ki he Kanaloa Hawaii Rugby ke fakakakato ange ‘enau tohi kole hū, pea kuo ‘osi e taimi ko iá. Lau ia ‘a Commissioner George Killebrew ‘o e MLR. Ka e tupu ai ‘a e lotomamahi ‘a e taki ‘o e Kanaloa Hawaii, Tracy Atiga. Kuó ne fehu‘ia ai ‘e ia ‘a e tu‘unga faka-pa‘anga ‘o e MLRugby. Mahalo na‘e mole ai ha pa‘anga malu‘i ‘a e Kanaloa Hawaii.
Ko e Kalapu LA Giltinis ‘oku faka-pa‘anga ‘e he kautaha ‘Aositelēlia ko e Loyals Rugby. ‘Oku nau ‘ōfisi taki mei he Venice Beach, California, pea ‘oku nau alea‘i mo e mala‘e Los Angeles Coliseum ke hoko ko honau mala‘e taú. Lau ia ‘a e CEO ‘o e Loyals Rugby, Matt Burgess.
(Ko e faiongoongo lea Tonga mo e Ingilisi taukei ‘a Mokofisi ‘i he mītia Tongá mo tu‘apule‘angá foki. Na‘e va‘inga ‘akapulu ‘iunioni ‘i Liahona High School, Nukunuku Rugby Club pea hokoatu ki he BYU-Hawaii varsity team. Na‘e hikiatu ai ‘o faiako ‘i he Alaska Pacific University Rugby Club, Anchorage, Alaska. Na‘e hoko ko e palesiteni ‘o e Alaska Rugby Union, pea hokoatu ‘o ne tataki ‘a e fokotu‘u ‘o e Utah Rugby Union ‘i he USA Rugby.)
