Vevela'i 'e Tonga 'a Kanata 33-23 Featured
10 'Aokosi, 2019. Na'e ikuna'i 'e he Timi 'Ikale Tahi 'a Tonga 'a e Timi 'a Fakafonua a Kanata 'i he Mala'e Churchill Park 'i Lautoka 'i Fisi 'aneafi 'aki ha kai koe 33 ki he 23 'a Kanata.
Ko e fuofua ikuna foki 'eni 'a Tonga 'i he fe'auhi 'a e Pacific Nations Cup hili ia 'enau 'ulungia 'i Ha'amoa pehe ki Sipani 'i he uike 'e ua kuo maliu atu.
Na'e 'ohake 'a kai 'o Tonga 'i he tu'u 'uluaki ki he 19 ki he 8 'a Kanata mei ha tata'o na'e fakahoko 'e he Le'okolo 'a Tonga Tevita Halaifonua, Kapakau Viliami lolohea pehe ki he'enau Senita Malietoa Hingano.
Ko e timi foki 'a Kanata na'a na mahanga he tu'u 'o e tepile poini mo Tonga koe 'ikai ha ikuna hili ia 'enau 'uluangia 'i Fisi mo 'Amelika he'enau ongo va'inga 'e ua ki mu'a.
'I he tu'u 'i he konga ua na'e fakahoko ai 'e he matatolu 'a ia na'e fetongi atu 'a Tonga ko Latu Talakai ha tata'o 'o 'alu hake ai 'a kai 'o Tonga ki he 26.
Na'e fakahoko 'e he Kapakau 'a timi 'a Kanata Patrick Parfrey ha tata'o hili ha taimi nounou mei he tata'o 'a Tonga 'o nau 'alu hake ai 'o 13 ki he 26 'a Tonga.
Na'e toe fakahoko 'e he foueti taka 'a Tonga ko Sione Vailanu 'a ia na'e fetongi atu ha tata'o 'o 'alu hake ai 'a e kai 'o Tonga ki he kai koe 33.
Na'e toe fakahoko 'e he timi 'a Kanata ha tata'o moha 'aka tautea pea 'i he kakato 'a e taimi kuo ikuna 'a Tonga ko e 33 ki he 23 'a Kanata.
'I ha fakamatala 'a e Kapinteni 'a Tonga Siale Piutau ki he kau faiongongo na'a ne pehe ai koe ikuna lelei 'eni ki he'ene timi pea 'oku kaunga lelei foki 'eni ki he'enau teuteu atu ki he fe'auhi Ipu 'a Mamani 'a ia 'oku teu fakahoko ki Siapani 'i Sepitema 'o e t'u ni..
