Fakamalo’ia’i ‘e he Palemia ‘a e Timi Tonga 'i he fe’auhi Sipoti ‘a e Pasifiki 2019 ^Featured

Na’e me’a ‘a e ‘Eiki Palemia ‘o pehe, “ ‘Oku ou fiefia ki he kotoa ‘o e fanau na’a nau folau he Timi ‘a Tonga, ‘i he lavame’a kuo mou fai ‘o mou ikuna ai ‘a e metali koula lahitaha mo e metali lahitaha ma’a Tonga ‘i he Sipoti ‘i ‘Apia.

‘I hono fakafehoanaki ki he ngaahi fe’auhi Sipoti Pasifiki kuo kau ki ai ‘a Tonga he kuohili, ko e leleitaha eni kuo a’usia ‘e Tonga pea ‘oku ou fakamalo ai ki he kotoa e kau memipa ‘o e Timi Tonga, pehe ki he kauPule folau, kau faiako mo e kau 'ofisa ngaue tokoni kotoa.”

Na’e ikuna ‘e he Timi Tonga ‘a e metali fakakatoa ‘e 29 ‘i ‘Apia; Koula ‘e hiva(9); Siliva ‘e nima (5) mo e Polinise ‘e tahanima(15).

Na’a nau fitu(7) ai ‘i he fakahokohoko ‘o e tukuifonua ‘e 22 mei he ‘Otumotu Pasifiki na’a nau kau ki he fe’auhi, ‘o ‘ikai lau kiai ‘a Nu’usila mo ‘Aositelelia.

Ko e kau ma’u metali koula ma’a Tonga ko: ‘Aisake Tu’itupou mo e metali koula ‘e ua he hiki me’amamafa;

‘Ata Maama Tu’utafaivahe, metali koula ‘e taha tolo me’amamafa ‘a e kakai fefine;

Mosese Foliaki mo e metali koula ‘i he puna ma’olunga ‘a e kakai tangata mo e hetolo mita ‘e 110 ‘a e kakai tangata;

Moala Takelo (koula e taha) mo e timi tangata (koula ‘e taha) mo fefine (koula ‘e taha) he sipoti Taekwondo;

Semisi Fanguna mo Matavao Fanguna Jnr he fe’auhi tauhoa ‘a e kakai tangata (koula ‘e taha) he Tenisi. 

Na’e toe me’a ‘a e ‘Eiki Palemia ‘o pehe, “Na’aku talotalo ki he Fale Alea ‘i he konga kimu’a ‘o e ta’u ni ‘o pehe te tau ikuna e ngaahi metali koula lahi taha he Sipoti ‘o e ta’u ni ‘o makatu’unga ‘i he fakalelei ngaue na’e fakahoko ‘e he Pule’anga ki he founga ‘oku fakalele’aki e sipoti ‘i hotau fonua pea mo hono fakakau mai e ngaahi tu’unga ke ‘uluaki ikuna pea ke toki faka’ataa ha taha ke ne fakafofonga’a e fonua.

‘Oku tukupa ‘a e Pule’anga ke ne ngaue’aki ‘a e ikuna kafakafa ‘etau fanau ke toe langa’i hake ‘aki ‘a e tu’unga ma’olunga ‘o e sipoti kotoa pe ‘i he kaha’u.

Pea na’e fakahoko ‘e he Palemia ‘a ‘ene me’a makehe fekau’aki mo e Timi Netipolo ‘a e fonua.

“Neongo na’a nau ‘ulungia ‘i he ‘Otumotu Kuki he tau’i e Metali Koula, na’e ‘ikai ke toe tuku ha ivi ‘o e fanau pea na’e matu’aki fakaholomamata ‘a ‘enau va’inga.”

‘Oku ‘amanaki ke foki mai ‘a e konga faka’osi ‘o e Timi Tonga ki Tonga ni ‘i he Tusite 23 ‘o Siulai.