Fili ‘o e Kau Poate Talekita Fo’ou ‘o e Kautaha Liiki Faka-fonua ‘a Tonga Featured
24 Ma’asi 2019. Fakatatau pea mo e tu’utu’uni ki he ‘Ofisi ‘o e ‘Ateni Seniale na’e fakahoko ‘i he Tu’utu’uni Fakamaau’anga Lahi ‘o e ‘aho 14 Ma’asi 2019, ‘oku loto ai ‘a e ‘Ofisi ‘o e ‘Ateni Seniale ke fakaha ki he Hou’eiki pea mo e Kakai ‘o e Fonua 'a e ngahai me'a ni.
'I he hili ‘a e Fakataha Lahi Makehe na’e ui ‘i he ‘aho Tokonaki 9 Ma’asi 2019, pea sea ai ‘a e ‘Ateni Seniale Le’ole’o ‘i hono fatongia ko e Kaungame’a Tokoni ki he Fakamaau’anga Lahi (‘Amicus Curiae’) ‘i he hopo sivile ko e (1) Silivenusi Taumoepeau (2) Evona Latu, (3) Suiti Leilani ‘Alatini, (4) Siona Tu’akalau v (1) Semisi Sika, (2) Stan Moheloa (3) Tonga National Rugby League Incorporated Society, CV 21/2018, na’e fili ‘e he Kau Fakafofonga ‘o e Kau Memipa ‘o e Kautaha Liiki Fakafonua ‘o Tonga ‘a e ni’ihi ko’eni ko e Kau Talekita ‘o e Poate ‘o e Kautaha Liiki Fakafonua ‘o Tonga:
(1) Sea ‘o e Poate ‘o e Kau Talekita: Mr Siaosi Koloamatangi, Kolomu’a
(2) Tokoni Sea ‘o e Poate ‘o e Kau Talekita: Mr Petuliki Mafile’o, Kolonga
(3) Talekita ‘o e Vahe Kolofo’ou: Mr Silivenusi Taumoepeau, Kolomu’a
(4) Talekita ‘o e Vahe Kolomotu’a: Mr Heimuli Pangai, Toa-ko-Ma’afu
(5) Talekita ‘o e Vahe Loto: Mr Lokingi Mavae, Vaini;
(6) Talekita ‘o e Vahe Hahake: Mr Siamelie Latu, Mu’a Saints
(7) Talekita ‘o e Vahe Hihifo: Mr Tonga Fonua, Ha’akame
(8) Sekelitali: Mr William C. Edwards Jr, Kolomu’a
Fakatatau pea mo e Tu’utu’uni Fakamaau’anga Lahi ‘o e ‘aho 16 Novema 2018, ko e Poate ‘o e Kau Talekita fo’ou ni ko honau fatongia ke “faka-lele ‘a e ngaahi ngaue ‘a e Liiki, ko e taha ko hono ‘atita’i fakalelei ‘a e pa’anga ‘o e Liiki ‘e ha ‘akauniteni totonu kuo lesisita mo ‘i ai ha’ane mata’itohi (qualified chartered accountant).
Hili hono faka-hoko kakato ‘a e ‘atita’i, ‘e hanga leva ‘e he Poate ‘o e Kau Talekita fo’ou ‘o ui ha Fakataha Lahi ke fili ‘a e Kau Poate ‘o e Talekita fo’ou, pea mo vakai’i ‘a e ngaahi ‘asenita anga maheni i he ngaahi Fakataha pehe ni.
‘Oku kei hoko atu pe ‘a Hon Semisi Sika, Tokoni Palemia, ko e Palesiteni ‘o e Kautaha Liiki Fakafonua ‘o Tonga, pea mo ‘Eiki Tevita ‘Unga Ma’afu ko e Tokoni Palesiteni ‘o e Kautaha Liiki Fakafonua ‘o Tonga, ‘o a’u ki ha taimi ‘e toki fetongi kinaua ‘i ha fili ‘e fakahoko ‘i ha Fakataha Lahi.
- AGO
