Sipoti Pasifiki 2019 - Felotoi TASA mo e Pule’anga ke filifili ‘a e lelei taha ke kau atu ki Ha’amoa Featured
11 Fepueli, 2019. Na’e lava lelei ha fakataha ‘a e kau fakafofonga ‘o e ngaahi Komiti sipoti ‘oku ‘amanaki ke nau kau atu ki he Sipoti Pasifiki 2019 ‘i Ha’amoa ‘i Siulai pea ko e taha ‘o e ngaahi tu’utu’uni ‘a e fakataha ke kole ki he Pule’anga mo e TASA ke nau meimei fua ‘a e ngaahi fakamole tefito, ka kuopau ke nau a’usia ‘a e ngaahi makatu’unga’i me’a (criteria) pea mo e tu’unga ma’olunga (standard) ‘o ‘enau sipoti takitaha pea mo ‘enau kau sipoti takitaha.
Na’e sea ‘i he Fakataha ‘a e pule folau (Chef de Mission) ki he Ha’amoa, Netina Latu pea kau atu ki ai mo ‘Inoke Afeaki ‘a ia ‘oku ne ngaue ki hono tuku atu ‘a e ngaahi tefito’i fiema’u kuopau ke fakakakato kae toki lava ke tali ke kau atu ‘a e sipoti pe ‘atelita koi a ki he sipoti Pasifiki, moe kau fakafofonga mei he ngaahi sipoti ‘e hongofulu tupu ‘oku nau kau he polokalama.
Na’e pehe mei ‘ofisi ‘o e TASA kuo fakahu atu ‘enau kole tokoni fakapa’anga ki he Pule’anga pea fakafou he Kosilio Sipoti pea kuo fai ai ‘a e fengaue’aki vaofi ke fakapapau’i ko e lelei taha pe ke kau atu.
Ko e fakafuofua he taimi ni ‘oku ofi ki he kau sipoti fakakatoa ‘e uangeau fangofulu tupu ka na’e pehe mei he ‘ofisi ‘o e TASA, ‘oku te’eki ke fua eni fakatatau ki he ngaahi me’afua (criteria and standard) pea ‘e ngalingali ‘e holo ‘a e tokolahi ia ko eni ‘o ma’ulalo ange he toko 200 pe toe tokosi’i ange ai.
‘Oku fakafuofua ki he sipoti fakakatoa ‘e 25 ‘oku nau fiekau atu ka ‘e makatu’unga pe ‘i he’enau paasi he ngaahi me’afua kuo fai ki ai ‘a e lave. ‘I he’ene tu’u he taimi ni ko e sipoti Pasiketipolo pe ‘a e kakai tangata (Men’s Team) kuo nau ‘osi paasi (qualify) hili ‘enau ma’u metali polonise he fe’auhi ‘a e FIBA mo e Ipu ‘a Polinisia (Polynesia Cup) na’e fakahoko he ta’u kuo ‘osi.
