‘Ulungia Mate Ma’a Tonga ‘i he Toa Samoa 18-16 Featured
Fiefia 'a e Timi Toa Samoa 'i he Ikuna
Gold Coast, 'Aositelelia.
Na’e ki’i tatūsia si’i ‘a e feinga ‘a e timi ‘Akapulu Liiki Fakafonua Mate Ma’a Tonga hili ‘a ‘ena tau tesi mo e kau to’a mei he timi Toa Samoa. Na’e ikuna ai ‘e he timi ‘a e Toa Samoa ‘a e va’inga ni ‘aki ha kai koe 18 ki he 16 ‘i ha va’inga fakaholomamata mo’oni.
Na’e fakahoko foki ‘a e tau ko’eni ki he mala’e Cbus Super Stadium ‘i Cold Coast 'i he 'aho Tokonaki 2 'Epeleli ‘i mu’a ‘i ha fu’u kakai ‘e toko 12,336. Fakatatau ki he fakamatala ‘a e Nusipepa ‘iloa koe Sdyney Morning Herald, koe tau ‘eni na’e ‘aonga 'a e mole 'a e kau mamata pea toe fakaholomamata foki.
Ko e malohi ‘eni ‘a e timi ‘a e Toa Samoa ‘o malava ai kenau pukepuke honau tu’unga fika 4 ‘i he fakahokohoko ‘a e ngaahi timi liiki hau ‘o mamani lolotonga ia ‘oku fika 16 ‘a e timi Mate Ma’a Tonga.
'Oku mahino ange foki 'a e taukei mo e matu'otu'a ange 'a e timi Toa Samoa ka na'e 'ikai tukua ai 'a e va'inga fefeka mo malohi 'a e Mate Ma'a Tonga. Ko e fetaulaki faka’osi ‘a e ongo timi ni na’e fakhoko ia ‘i he 2013 ‘a ia na’e ikuna ai ‘a e timi Mate Ma’a Tonga ‘aki ‘a e kai koe 36 ki he 4 ‘a e Toa Samoa.
