Fiema’u ke fakapapau’i ‘a e tokolahi ‘o e ngaahi sipoti ki he Sipoti Si’i ‘a e Pasifiki ‘i Vanuatu Featured
4 'Okatopa, 2017. Na’e fakahoko ha fakataha makehe ‘a e Komiti Ngaue (Games Sub-Committee) ki he Sipoti Si’i ‘a e Pasifiki ‘a ia ‘e fakahoko ki Vanuatu he faka’osinga ‘o e ta’u ni.
Ko e taha ‘o e me’a mahu’inga na’e tokanga ki ai ‘a e Komiti ko e fakamole koia ki he folau mo e tokolahi ‘o e ngaahi sipoti pe timi takitaha.
Na’e ‘osi fai foki ha ngaahi faka’eke’eke ki he ngaahi Kautaha Fefolau’aki hange ko e Air Fiji, Air New Zealand pea mo e Pacific Blue (Virgin) pea mahino ai ‘a e ma’olunga mo e mamafa ‘a e totongi.
‘Oku ongo foki eni ‘i he taimi ‘oku te’eki papau pe ‘e ‘i ai ha tokoni fakapa’anga mei Pule’anga he ‘oku nau kei “Pule’anga Fakataimi” pe foki.
Kaekehe, na’e fai ‘a e faka’eke’eke ki he Kautaha Vakapuna Air Vanuatu pea na’e ma’u mai mei ai ha fokotu’utu’u folau (charter) ki he folau ‘e tolu ‘o fu’u ma’ama’a ange ia he ngaahi ‘esitimeti
mei he ngaahi Kautaha koee.
Na’e loto taha ai ‘a e Komiti Ngaue ke ui ha fakataha mo e ngaahi Komiti Sipoti Fakafonua (National Federations) ke fai ha femahino’aki pea mo e fokotu’utu’u ki ha kole ki he Pule’anga ki he tokoni fakapa’anga ki hono fakafolau ‘o e Timi ‘a Tonga ki he sipoti.
Na’e tali ai pe ‘e he Komiti ke fai ha ngaue ke fakafatongia’aki ha Kautaha Fefolau’aki (Travel Agents) ke nau fakahoko ‘a e ngaahi palani mo e fokotu’utu’u ‘a e TASA pea na’a lava ke tu’uaki atu mo e ngaahi sea ‘e ‘ataa ki he kakai ‘o e fonua ‘i he totongi matu’aki ma’ama’a mo’oni mo faka’atu’i.
‘Oku fokotu’utu’u ‘a e fakataha mo e ngaahi Komiti Sipoti Fakafonua ki he ‘aho Falaite 6 ‘o ‘Okatopa ‘i he taimi 12.30 ho’ataa.
