To Folofola Huufi 'o e Fale Alea 'e he Tama Tu'i Tupou VI Featured
Hou'eiki Memipa 'o e Fale Alea 'o Tonga
7 Me, 2020. Na'e fakaava faka'ofisiale 'a e Fale Alea 'o Tonga 'i he pongipongi 'o e 'aho ni 'e He'ene 'Afio Kingi Tupou VI 'aki ha'ane To Folofola mei he Taloni 'o fakafou mai pe 'i he 'ata moe ongo 'i he 'initaneti (live stream).
Ko e To Folofola leva 'eni 'a e Hau 'o e Fonua.
Folofola 'a 'Ene Afio 'i he Huufi Fale Alea
07 ‘o Mē, 2020 Fakatapu:
Tapu mo e ‘afio ‘a e ‘Otua ko e Hufanga kiate kitautolu mo ha Mālohi;
Ko e Tokoni ‘i he mamahi mātu’aki ofi.
Tapu mo e ‘Eiki Sea ‘o e Fale Alea ‘o Tonga,
Tapu mo e ‘Eiki Palemia mo e Kau Minisitā ‘o e Kapinetí,
Tapu mo e Kau Fakafofonga ‘o e Hou’eiki Nōpele mo e Kau Fakafofonga ‘o e Kakaí.
Pea ‘oku ou fakatapu ki he tangata mo e fefine’i fonua ‘oku a’u atu ki ai ‘a e huufi ‘o e Fale Alea ‘o Tonga ki he ta’u 2020/2021.
‘Oku kei pōpō’uli mo tapu ‘a e ngaahi fonua lahi ‘i mamani; longonoa ‘a e ngaahi loto kolȯ mo nofo fale ‘a e fāmili; tu’u ‘a e fefolau’akí pea tāpuni ‘a e ngāue’anga; mole ‘a e mo’ui ‘a e tokolahi; pea holo ‘a e tu’unga fakapa’anga; ko covid 19 ia mo hono fu’u mafi; ‘oku ‘ikai hano fakangatangata pe faito’o.
Ko e tu’u hotau fonuá he ‘aho ni, ‘oku tau fakafeta’i he’etau hao mai. ‘Oku ou fakamālō’ia ‘a e talangofua mo e katekina ‘a e ngaahi tu’utu’uni kuo tuku atu. Ko e fai kotoa pē ko hotau malu’i mo e lelei ma’ae kakaí.
‘I he lolotonga ‘o e Tapú, kuo tō mai ‘a e Saikolone ko Hāloti, ‘one to’o ‘a e ngāue’anga fakataki mamata ‘i Hihifo Tongatapu, Ha’apai mo ‘Eua pea ta’aki e taulangá, mo maumau’i ‘a e ngaahi kolo tu’u he matātahí. Ko e tūkunga ia he ‘aho ni ‘oku tau fehangahangai.
Ko e ngaahi feliuliuaki ‘e hoko maí, ‘oku tu’u ki he faingata’a ange. ‘Oku ‘ikai ke tatali ‘a e faingata’á ia ke ‘osi ‘a Covid 19 kae toki hoko mai ‘a Saikolone. ‘Oku ‘ikai ala ta’ofi, pe toloi, pea hangē ‘oku faka’au ki he lalahi mo toutou hoko mai.
Ko e fonua mo e kakai ‘oku nau tokateú, ko kinautolu ia tenau ala matu’uaki ‘a e ngaahi faingata’á. Ko e fonua si’isi’i ‘a Tonga, pea ‘oku tala mei hotau tukufakaholȯ, ‘a e poto mo e ‘ilo, mohu founga mo e lavame’a, ‘a e to’utangata ‘o e kuohilí. Ko e tu’u ki he kaha’ú, ‘oku hā mai ‘a e maumau ki he ‘atakaí, ‘e tu’u ke uesia ai ‘a e ma’u’anga me’atokoní, pea ‘e ‘i ai e nounou pe honge.
Te tau kei fe’ao pē mo e vailasí pea mo e fakatamaki fakanatulá, ka ko e kakai tenau ikuna ‘a e faingata’á, ‘oku ‘ikai hā ‘a fakapikopiko ia mo fa’a mohe he’enau ‘asenitá. ‘Oku falala kiate kinautolu honau familí, ‘oku ‘ikai manavahē, ‘oku fakapotopoto telia e tūkunga e nofȯ: ka tō ha matangi, mate ‘a e ‘uhilá, si’isi’i ‘a e ma’u’anga vaí, pe ‘osi ‘a e lolȯ, kuo ‘osi ‘utu pē ‘enau ngaahi maamá ‘o hangē ko e kau taaupo’ou potȯ.
‘I he tu’u ki he kaha’ú mo e mateuteú ‘oku lahi ‘a e ngāue ki he Fale ni. ‘Oku fiema’u ki ai e ngaue fakataha ‘o taumu’a ki he lelei ‘a e kakaí mo e langa hake ‘o e fonuá.
‘Oku tau tali mo e loto hounga’ia mo’oni ‘a e ngaahi tokoni kotoa pē kuo a’utaki mai mei he ngaahi fonua mulí, ke malu’i e mo’ui ‘a e kau ngāuė mo e kakaí, pea ke tau teuteu ki he feliuliuaki ‘a natula mo e ngaahi liliu ‘oku ‘omai ‘e covid 19, ki he ma’u’anga mo’uí, tu’unga faka’ekonomika ‘o e fonuá, fefolau’akí, taki mamatá, sipotí, pisinisí, fetu’utakí mo e ngaahi me’a lahi.
‘Oku ou talamonū atu ki he ngāue ‘o e ta’ú.
‘Ofa atu
'Oku anga maheni 'aki pe foki 'a hono kamata 'o e to'u Fale Alea he ta'u kotoa 'aki hono alea'i 'a e Patiseti 'a e fonua ki he ta'u fakapa'anga hono hoko 'a ia koe ta'u fakapa'anga 2020/21 'eni 'e hoko kiai.
