Launga’i ola Fili Si’i ‘a Tongatapu 1 ^Featured

‘Oku ‘i ai foki ‘a e ngaahi makatu’unga ‘oku fakahoko ‘aki ‘a e launga ko’eni pe ‘oku takimu’a mai foki ‘i he launga ko’eni ‘a e matāpule mei Kolomotu’a pe ko ‘Eliesa Fifita pea kuo fakahā foki ‘e ‘Eliesa Fifita koe tokolahi taha ‘o e toko 1144 na’a nau fili kia Netatua Pelesikoti Taufatofua ‘oku nau poupou ki he lāunga ko’eni.

‘I ha Ongoongo Tukuatu (Press Release) ‘a e Kingdom Sun Media na’e tuku mai ki he ngaahi kautaha ongoonmgo ‘i he uike kuo’osi na’e fakamahino ai ‘a e ngaahi makatu’unga ‘oku fakahoko ai ‘a e launga ni ‘a ia ‘oku anga pehe ni leva:

1. Na’e laka hake ‘i he toko 20 na’e ta’efakalao ‘a ‘enau fili ‘a ia na’e ‘ikai kenau nofo ‘i Kolomotu’a ‘o laka hake ‘i ha mahina ‘e 3 pea ‘oku pehē ‘oku ma’u ‘a e fakamo’oni koe tokolahi ‘o kinautolu na’a nau fili ‘i he Fai’anga Fili Hala’ovave.

2. ‘Oku toe tukuaki’I foki ‘e kinautolu ‘oku nau fakahoko ‘a e launga ni ‘oku ‘osi ma’u mo e fakamo’oni ‘o pehe ko ni’ihi na’a nau kau atu ki he fili na’e fakangofua pe ‘e he kau ‘ofisa faifili kenau fili pea ‘ikai toe fakahoko ha vakai ia ki he’enau ngaahi ID.

3. ‘Oku toe tukuaki’i foki na’e toe fakapipiki mo e tā tu’uaki ia ‘o e Kanititeiti Fika 1 Siaosi Pohiva ‘i he tesi ‘o e taha ‘o e ngaahi tesi ‘i he fai’anga fili Hala’ovave lolotonga ia ‘oku ‘ikai ke ngofua ‘i he tu’utu’uni ‘a e lao.

4. ‘Oku toe tukuaki’i foki ‘e he kau launga na’e ‘i ai ‘a e ngahai fakamanamana mo hono taukae’i ‘o e kau fili mo e kau poupou ‘o Dr. Pelesikoti Taufatofua ‘o fehangahangai ia mo e Kupu 22 (1) (2) mo e (3), ‘o e Lao Fili 2012.

‘Oku pehe ko e ngahai fakamanamana ko’eni na’e tukumai ia ‘i he ngaahi peesi feisipuka ‘a e PTOA pea na’e taumu’a ki he kau poupou ‘o Dr, Netatua Pelesikoti Taufatofua pea ‘e fakahoko mo e me’a kiate kinautolu.

Kuo ma’u foki mo e fakahā mei he Supavaisa ‘o e fili Pita Vuki kuo ‘osi a’utaki ange ‘a e launga ko’eni kiate kinautolu ki he ‘Ofisi ‘o e Komisoni Fili pea ‘oku nau ngaue leva kiai ‘o fakatatau p emo e tu’utu’uni ‘a e lao.

‘Okiu ‘ikai foki koha me’a fo’ou ‘eni hono vakai’i ‘a e ola ‘o e fili Fale Alea he kuo ‘osi hoko ki mu’a pea koe founga totonu pe ia ke fakahoko ‘o fakatatau mo e pule ‘a e lao.