Hoko atu Kapineti lolotonga ko e Pule'anga faka-taimi hili hono veteki 'e he Tu'i Fale Alea 'o Tonga ^Featured

Ko hono veteki 'eni 'e he Tu'i 'a e Fale Alea 'i hono 'ai mahino 'oku makatu'unga 'i he 'ikai ke fakafiemalie 'a e to'o fatongia 'a e Palemia mo 'ene Kapineti 'o fakatatau mo e ngahi taumu'a ki he lelei fakalukufua 'o e fonua pea kau kiai mo e tonounou 'a e founga ngaue pea maumau ai 'a e lao 'o e fonua.

'Oku mahino foki ko hono veteki ko'eni 'a e Fale Alea 'oku ta'e'aonga katoa 'a e memipa 'a e toenga 'o e kau Fakafofonga Nopele mo e Kakai tukukehe ange 'a kinautolu 'oku nau 'i he lakanga faka-Minisita mo e Palemia  'a ia ko kinautolu 'oku nau hoko atu koe Pule'anga faka-taimi kae 'oua leva kuo a'u ki he Fili Fale Alea 'o e 'aho 16 'o Novema 'o e ta'u ni.

Ko hono fakalea 'e taha 'oku 'ikai ke toe 'i ai ha Fale Alea 'i Tonga 'i he lolotonga ni kae 'oua kuo fakahoko 'a e fili Fale Alea hoko.

Na'e fakahoko foki hono talaki 'a e hoko atu 'a e Pule'anga lolotonga 'i he lakanga fakataimi 'i he 'aho Tokonaki 26 hili ia ha fakataha 'a e Kapineti pea fakamahino ai 'e hoko atu pe 'a e fatongia ki he fonua 'o fakatatau ki he tu'utu'uni mei he Fakataha Tokoni mo e Konisitutone 'o e fonua..

'Oku mahino foki 'i he taimi tatau 'o hange pe koha fa'ahinga Pule'anga faka-taimi 'oku fakangatangata 'a e mafai 'o e Palemia mo 'ene Kapineti 'o kau ki he ngaahi tu'utu'uni ki he ngaahi me'a faka-pa'anga pea 'e 'ikai ngofua kenau fakahoko ha 'u liliu lalahi pe ngaue langa lalahi ka koe le'ole'o 'ata'ata'a pea ke fakapapau'i 'oku lele anga maheni pe 'a e ngaahi sevesi ki he fonua.

'Oku 'ikai foki koha me'a fo'ou 'eni 'i he Pasifiki 'a hono veteki 'o e Fale Alea ka 'oku nofo 'a e mafai tatau 'i he lakanga 'ulu 'o e fonua (Head of State) 'a ia koe kau Palesiteni pe Kovana Seniale 'i he ngaahi fonua kaunga'api ka ko Tonga ni 'oku 'i he Tu'i 'a e mafai koia.

Ko e me'a ngaue faka-Temokalati mo faka-Konisitutone 'eni pea ko hono fuofua ngaue'aki 'eni 'i Tonga ni.