Kamata hiki 'a e kainga 'Atataa ki honau kolo fo'ou

Ko e hiki foki ko'eni 'i he ofi ke kakato 'a hono langa 'o e ngaahi nofo'anga 'o kinautolu na'e uesia 'i he puna 'a e mo'unga afi Hunga To nga Hunga Ha'apai 'o e fakatupunga 'a e peaukula 'i he 'aho 15 'o Sanuali 2022.

Na'e uesia lahi 'a e motu ni pea na'e pau ai kenau fetukutuku ki he feitu'u fo'ou 'o fakatatau ki he ngahai fale'i mei he Ma'u Mafai.

Na'e fakaava mo fakatapui 'a e kolo fo'ou ni mo hono ngaahi nofo'anga 'e he Ta'ahina Pilinisesi Angelika Latufuipeka Tuku'aho 'i 'Atata Si'i 'a ia 'oku tu'u 'i he vaha'a 'i he ngata'anga 'o e kolo ko Masilamea 'i he tafa'aki faka-Hihifo.

Ko e lava ia 'a e mahina  'e 11 mei he hoko 'a e fakatamaki fakaenatula pea ko e fetukutuku mai 'a e kainga mei he motu ko 'Atataa na'e fokotu'utu'u pe ia 'e he P{ule'anga mo e Pilinisi Ata 'a ia ko e Hou'eiki mo e ma'u tofi'a pe ia 'o e kolo .

Na'e fakamalo'ia 'e he 'Eiki Palemia Hu'akavameiliku 'a e Ta'ahine Pilinisesi pe he ki he ngaahi kautaha langa na'a nau fakahoko 'a e ngaue ni pe he ki he ngaahi fonua muli mo e ngaahi kautaha tokoni na'a nau fakapa'anga 'a e ngaue ni.

Ko e ngaahi tokoni ko'eni na'e fakahoko ia 'i he fengaue'aki vaofi mo e Pule'anga Tonga pea na'e lahi mo e tokoni kehe na'e fakahoko ki he kainga ni 'o kau ai e ngaahi vaka toutai, koloa faka'api pehe ki he ngaahi tokoni kehe kuo taa'imalie ai 'a e kainga ni.

Na'e me'a foki he oua ni 'a e Hou'eiki Minisita 'o e Kalauni, Kau fakafofonga 'o e ngaahi Pule'anga muli pehe ki he kau fakaafe tokolahi.