Foaki 'e Siapani loli valitaa 'e 3 ma'a Tonga

Na'e fakahoko 'a e ouau ko'eni 'i he pongipongi Falaite ko hono 21 'o 'Okatopa 'i tu'a 'i he Senita Fakataha'anga Fa'onelua pea na'e me'a ai 'a e 'Eiki Palemia pehe ki he Hou'eiki Minisita 'o e Kapineti, 'Amipasitoa Siapani mo ha kau fakaafe kehe foki.

'I ha me'a 'a e 'Amipasitoa Siapani 'i he ouau ni na'a ne pehe ai ko e konga 'eni 'a e tokoni 'a Siapani ki hono fakalelei 'a e ngaahi Hala Pule'anga 'o e fonua pea 'oku 'i ai moe ngaahi tokoni kehe 'e hanganaki mai ki he kaha'u fekau'aki mo e akalelei ki he Hala Pule'anga.

Na'e tali foki 'e he 'Eiki Palemia 'a e me'a'ofa ko'eni pea na'a ne me'a 'o fakamalo'ia 'a e tokoni 'a Siapani mo e fakavikiviki 'a e ola lelei 'i he va fengaue'aki 'a e ongo fonua.

Ko e 'Eiki Minisita Ki he Ngaahi Ngaue Lalahi Hon. Seventeen Toumo'ua na'a ne fakamo'oni ki hono tali 'o e me'a'ofa ko'eni pea 'oku tauhi 'a e me'angaue ko'eni 'i he Potungaue ki he Ngaahi Ngaue Lalahi.

'Eiki Palemia, 'Amipasitoa Siapani mo e ni'ihi 'o e Hou'eiki Minisita 'o e Kapineti na'a nau kau mai ki he ouau ni.