Hoko atu fekumi ki he kau tangata mole 'i tahi
8 Sepitema 2022. ‘I he’ene a’u mai ki he ‘aho ni´ ‘oku kei ngāue fakataha ‘a e Polisi Tonga´ mo hono ngaahi hoa ngāue fakahaofi mo’ui´, ‘o kau ai ‘a e Va’a Tautahi ‘a e Kau Tau ‘a ‘Ene ‘Afio´, mo ha ngaahi vaka taautaha kehe pē, ‘i he hokohoko atu ‘a e fekumi ki he kau tangata ‘e toko 3 ‘oku nau kei mole 'i tahi.
Ko e mole 'eni makatu'unga mei he fakaevaha ko ia na’e hoko ‘i he ‘aho Tūsite 30 ‘o ‘Aokosi 2022.
Na’e ‘uluaki ’ilo foki ‘a e fakatamaki´ ni ‘i he kakau mai e taha ‘o e toko 6 ne folau´, ‘a ia ko Feleti Tahifisi Faha’ivalu (ta’u 49) mei Vainī ‘o hake ‘i Niutōua ‘i he hengihengi Pulelulu ‘aho 31 ‘o ‘Aokosi´.
Na’e ngāue atu leva ‘a e fekumi´ ‘o ma’u ‘i he pongipongi Pulelulu pē ko ia´ e ongo matāpule ‘e toko 2, ko Tevita Sākea Vailea (ta’u 60) ‘o ‘Ohonua, ‘Eua´, pea mo Makisi Tonga (ta’u 42) ‘o Nualei´ ne ma’u kuo´ ne ‘osi pekia.
Na’e hokohoko atu pē ‘a e fekumi´ ‘i he ngaahi matāfanga takatakai ‘o e Vahe Hahake´, ‘i tahi pea mo ‘uta fakatou’osi. Na’e ‘i ai mo e faingamālie ke fakahoko hono fakasio mei he ‘ataa´ ‘i he tokoni mai e kautaha vakapuna Lulutai´.
Kātoa e ngaahi feinga´ ni ne ‘ikai ha ola. ‘I he pongipongi Tu’apulelulu ‘aho 1 Sepitema 2022, na’e a’u atu ai ‘a e fekumi´ ki he fanga ki’i motu ‘i he tafa’aki faka-Tokelau mo e faka-Hahake ‘o Tongatapu´, ‘o kau ai ‘a ‘Eueiki, Tau, ‘Ata, Nuku, Fukava, Motutapu, ‘Onevao, ‘Onevai pea mo Monuafe.
Ne fakahoko foki e kumi takai ‘i he ngaahi matāfanga ‘o e ngaahi kolo ‘o Hahake´ mei Lavengatonga ki Niutōua. Na’e ma’u ai ha līpooti mei he fanga ko ‘Emeline´ ‘i Niutōua´, ha ngaahi naunau na’e tafia mai ki he matā’uto’uta´.
Na’e kau ‘i he ngaahi naunau ko ‘eni´ ha ngaahi hina lolo pea mo e ngaahi koloa kehe pē. Ko e matāpule ‘e toko 3 ko ia ‘oku kei mole´ ‘oku kau ai ‘a e ongo tangata mei ‘Ohonua, ‘Eua ko Malakai Tonga Vailea pē ko ia na’e ‘iloa ko Kelepi Vailea (ta’u 40), mo Pita Sānele ‘Uvea (ta’u 42), kae pehē kia Tu’italau Kingston Tonga (ta’u 15) ‘o Nualei´.
‘Oku kole atu ai heni ‘a e kau Polisi´ ki ha taha pē ‘oku´ ne ma’u ha fakamatala ‘e ala tokoni ki he fekumi ‘oku lolotonga fakahoko´, tautautefito ki he vāhenga fakahahake ‘o Tongatapu´, ngaahi kolo ‘i he Hala Liku´, ‘Eueiki, mo e Vāhefonua ‘Eua´, ke mou kātaki ‘o fetu’utaki mai ki he 922, 23-713, 770-1271 pē 783-7221.
