Fekumi ki ha kau tangata ‘oku mole ‘i tahi ^Featured

Fakatatau ki he fakamatala 'oku ma'u mo a'utaki mai fakafuofua ki he taimi ‘osi ‘a e 7 efiafi ‘aho Tūsite, 30 ‘o ‘Aokosi 2022, na’e fakahekeheka ha kau tangata ‘e toko 6 ‘i he Uafu ‘i Afaa’ ‘i ha ki’i vaka faipa liu fakamanga fakafuofua ki he mita e 6 – 7 hono lōloa, mīsini horsepower 60, ‘o nau mavahe atu ko e fakataumu’a e folau´ ki ‘Eua.

‘I he a’u ko ia e folau´ ki he mui’i hopohoponga´, ’i he vaha’a ‘o Niutōua pea mo ‘Eueiki´, na’e hoko ai ha fakatamaki ‘o ngoto ‘a e vaka´.

Ne nau feinga ai ke kumi mo’ui ki ha ngaahi hina lolo na’e fakapoe ki he vaka´, ka ne vave ‘a e mamalu hifo ‘a e po’uli´, ‘o nau fepulingaki ai.

Na’e kakau mai ha taha ‘i he kau tangata´ ni ‘o hake ‘i Niutōua fakafuofua ki he ‘osi ‘a e 2:00 hengihengi ‘o ne ma’u faingamālie ki ha telefoni ‘o līpooti mai ki he kau Polisi´.

Na’e ngāue atu leva ‘a e vaka fakahaofi mo’ui ‘a e Polisi Tonga´, ‘a e ‘Alo Tolu´ pea mo hono ui ha ngaahi vaka tokoni ki he feitu’u fakafuofua ne hoko ai e fakatamaki´ ni.

Na’e kau mai ai ki he kumi´ ni ‘a e vaka e Va’a Tautahi ‘a e Kau Tau ‘a ‘Ene ‘Afio´, mo ha ngaahi vaka tokoni taautaha pē.

’I he houa pongipongi ‘o e ‘aho ni´, na’e lava ‘o ma’u ha ongo matāpule ‘e toko ua ‘o e kau folau´, ko e taha kuo´ ne pekia.

‘Oku kei hokohoko atu pē ‘a e ngāue e vaka Polisi´ fakataha mo e vaka ‘a e Kau Tau ‘a ‘Ene ‘Afio´ ke fekumi ki he toko 3 ko ia ‘oku kei mole´.

‘Oku kole atu heni ‘a e kau Polisi´ ki ha taha ‘oku´ ne ma’u ha fakamatala ‘e ala tokoni ki he fekumi ‘oku lolotonga fakahoko´, tautefito ki he vāhenga fakahahake ‘o Tongatapu´, ngaahi kolo ‘i he Hala Liku´, ‘Eueiki, mo e Vāhefonua ‘Eua´, ke mou fetu’utaki mai ki he 922, 23-713, 770-1271 pē 783-7221.