Hokohoko lelei atu ako mo e kau to kava Vava'u Featured
Polokalama Ako Vahenga Vava'u 14 na'e fakahoko ki Longomapu
24 'Aokosi 2022. 'Oku lolotonga hokohoko lelei atu 'a polokalama ako ma'ae kau to kava 'a e Vahefonua Vava'u 'a ia 'oku lolotonga lele mafana 'i he ngaahi Vahenga Fili 'o Vava'u.
Ko e polokalama ako 'eni 'oku fakahoko 'e To'imoana Takataka mei he Tonga Growers Federation pe koe Kautaha 'a e Kau Ngoue 'a Tonga 'i he fengaue'aki vaofi mo e Potungaue Ngoue, Potungaue Fefakatau'aki mo e Langa Fakalakalaka Faka-'Ikonomika pehe ki he Vava'u Kava Society fakataha mo e ngaahi kulupu kehe pe 'i he Vahefonua Vava'u.
'Oku kau mai foki 'a 'Eiki Minisita Fefakatau'aki Dr. Viliami Uasike Latu ki he polokalama ko'eni pea 'oku mahino mai 'a e tu'u fakataha 'a e kau ngoue kava 'o e Vahefonua Vava'u ke poupou ki he ako ko'eni mo e ngaahi fokotu'utu'u 'a e Pule'anga mo e ngaahi kupu fekau'aki ki ha lelei ma'a e kau to kava 'o e Vahefonua Vava'u.
Polokalama Ako Vahenga Vava'u 16 'i Holo SUTT Leimatu'a
Kuo lava kakato 'a e polokalama ako ki he Vahenga Vava'u 16 mo e Vahenga Vava'u 14 pea 'oku mahino mai 'a e fu'u poupoua 'a e polokalama ni pea 'oku toe 'eni 'a e Vahenga Vava'u 15 ke fakakakato kiai 'a e ako ni.
Na'e toe fakamahino foki 'e he 'Eiki Minisita Fefakatau'aki mo e tu'unga 'oku 'i ai 'a e tu'utu'uni 'a e Pule'anga ki he 'Inivesi Muli (Foreign Investment) 'a ia 'oku fakafou mai 'i he Potungaue Fefakatau'aki mo e Langa Fakalakalaka Faka-'Ikonomika pea 'oku mahino 'a e poupou 'a kau to kava 'o e Vahefonua ki he fokotu'utu'u ko'eni 'i hono toe fakamahino kiate kinautolu 'a e faka'amu 'a e Pule'anga.
'Oku fakapa'anga 'a e polokalama ako ko'eni 'e he Growers' Federation pea tokoni kiai mo e Potungaue Ngoue pehe ki he Potungaue Fefakatau'aki pea poupou kiai mo Sione Vuki mo 'Alaipuke 'Esau mei he Vava'u Kava Society.
