Hoko 'a Siamelie Latū ko e CEO fo'ou Komisoni ‘Uhila ^Featured

Ko e hili ‘eni ha ta’u ‘e 5 mei he CEO fakamuimui ki he Komisoni ‘Uhila ‘a Lord Dalgety talu mei he 2017.

Na’e Pule Le’ole’o ‘i he lakanga ni ‘a Paula Tupou, pea hoko mai ‘a e fua fatongia Le’ole’o ‘i he lakanga ni ‘e Kilisimasi Ma’asi ‘i ha ta’u ‘e 4, pea ‘i he ‘aho ni kuo fokotu’u ‘a Siamelie Latu ko e pule fo’ou (CEO) ki he Komisoni ‘Uhila.

Kuo ngāue mai foki ‘a Siamelie ‘i ha ngaahi fatongia kehekehe.  Na’a ne hoko ko e Colonel ‘i he Tonga Defence Services pe ‘iloa ko e Kau Tau Malu’i ‘o ‘Ene ‘Afio he ‘aho ni ‘a ia kuo ne ngāue ai ‘i ha ta’u ‘e 40.  Na’a ne hoko ko e Fakafofonga ‘o Tonga ni, ko e Ambassador ki Siaina he ta’u ‘e 5. 

Na’a ne foki mai ki Tonga ni ‘o to e hoko atu ‘e ne ngaue ki he Potungaue ki Muli ko e Sekelitali Le’ole’o ‘i he 2017. 

‘Oku to e ‘i ai mo hono ngaahi fatongia kehekehe, hangē ko e Talekita ki he Poate ‘o e Tonga Assets Manager and Associates, mo e Tonga Market Corporations Limited, hoko ko e Sekelitali Seniale ma’ae Tonga China Friendship Association pea ko e Pule Lautohi Fakasapate foki ia ma’ae Siasi Konisitutone Tau’ataina ‘o Tonga ‘o e Vahenga Haveluloto mo e ngaahi fatongia ngāue kehekehe.