'A'ahi mai 'a e Minisita Ki Muli 'a Nu'usila ki Tonga ni Featured
Tamatu'i Tupou VI mo e Minisita Ki Muli 'a Nu'usila Hon. Nanaia Mahuta pehe ki he 'Eiki Minisita Ki Muli 'a Tonga Fekitamoeloa 'Utoikamanu
19 'Aokosi 2022. Na'a tu'uta 'aneafi 'i he Mala'e Vakapuna Fua'amotu 'a e Minisita Ki Muli 'a Nu'usila Hon. Nanaia Mahuta pea na'e muimui folau mai ai 'a e Sekelitali 'o e Potungaue Ki Muli 'a Nu'usila mo 'ene kau 'ofisiale kehe.
Ko e folau mai ko'eni koe taumu'a fakakaume'a ke fakamahino 'a e tu'unga fuoloa mo ma'uma'uluta 'i he va fengaue'aki 'a Nu'usila mo Tonga pea ke kei hokohoko lelei atu pe 'i he'ene tu'u koia ki he kaha'u.
'E kau 'i he'ene folau ko'eni pea tene fakahoko ha me'a fekau'aki mo e kaveinga ko e Pacific Resilience Climate Change 'a ia 'oku 'uhinga ki hono tokangaekina 'a Feliuliuaki 'a e 'Ea pehe ki ha founga 'e fakapa'anga 'aki pea 'e fakahoko 'eni 'i ha polokalama 'e fakahoko ki Fangaloto.
Na'e talitali lelei 'a e folau ni 'i he Mala'evakapuna Fua'amotu 'e he 'Eiki Minisita Ki Muli Fekitamoeloa 'Utoikamanu pehe ki he 'Eiki Minisita Ki he Fefakatau'aki mo e Langa Fakalakalaka Faka'ikonomika Dr. Viliami Uasike Latu pehe foki ki he Haikomisiona 'a Nu'usila ki Tonga.
Na'e hoko atu ai pe folau mei he Mala'evakapuna Fua'amotu ki he Mala'evakapuna Kaufana ki 'Eua pea na'e fakahoko ai 'a e fakataufolofola ki he Tama Tu'i 'i he Palasi Heilala Tangitangi 'i 'Ohonua pea toki foki mai 'a e folau ki Tonga 'Eiki.
Na'e hoko atu ai pe 'a e fakataha mo e 'EIki Palemia 'o Tonga pehe ki he ni'ihi 'o e Hou'eiki Minisita 'o e Kapineti pehe ki he'ene kau folau pea na'e fakahoko pe foki 'eni ki he Loki Kapineti 'i he 'Ofisi 'o e Palemia.
Na'e kau he ngaahi kaveinga na'e fakahoko kiai 'a e fakataha mo e 'Eiki Palemia 'o Tonga mo e Pule'anga 'a kinautolu 'oku tipooti mai mei muli 'a e faingata'a kenau mahino'i 'a Tonga ni mo e 'ikai kenau 'ilo ki he anga fakafonua he na'a nau tupu hake 'i muli.
Na'e kau atu kiai 'a e kaveinga ki he palopalema fakasosiale 'i he kau toli mo e faka'amu na'a lava atu mo honau ngaahi famili ki Nu'usila, totongi ako 'a e kakai mei he Pasifiki 'i Nu'usila 'oku fu'u mamafa, Feliuliuaki 'a e 'Ea, polokalama fengaue'aki fakakautau 'a e ongo fonua, fokotu'utu'u ke toe fokotu'u 'a 'Ofisi Haikomisiona 'a Tonga ki Nu'usila mo e ngaahi kaveinga kehe pe 'o kau ai 'a e langa fakalakalaka aka'ikonomika.
'Oku 'amanaki ke foki atu 'a e folau 'a e Minisita Ki Muli 'a Nu'usila mo 'ene kau folau he efiafi 'o e 'aho ni.
