Foaki $760,000 ki he 'Eiki Palemia 'e he Haikomisiona Tonga ki 'Aositelelia ^Featured

Ko e pa'anga ko'eni na'e tanaki ia 'o fakafou 'i he polokalama tokoni na'e 'iloa koe FakalikuTonga pea na'e fakataumu'a ke tokoni ki he fonua hili 'a e puna 'a e mo'ungaafi Hunga Tonga Hunga Ha'apai mo e sunami na'e to 'i he fonua  'i Sanuali 'o e ta'u ni.

Ko hono foaki 'o e tokoni ko'eni na'e fakahoko ia lolotonga 'a e fakataha mo e 'a'ahi atu 'a e 'Eiki Palemia ki Senee hili 'ene kau atu ki he fakataha 'a e kau Taki 'o mamani fekau'aki mo e "oseni 'a ia na'e fakahoko ki Palau 'i he kamata'angfa 'o e mahina ko 'Epeleli.

Na'e fakahoko 'a e fakataha ko'eni ki he 'Ofisi 'o e Konisela Seniale (Consulate General of Tonga) 'a Tonga  'i Senee pea na'e me'a ai 'a e 'Eiki Minisitā Ki Muli Fekita 'Utoikamanu pehe ki he Konisela Fakalangilangi 'a e Tonga 'i Sene Louise S.R. Waterhouse pehe ki he kau 'ofisiale kehe na'e muimui folau atu 'i he 'Eiki Palemia mo e kau ngāue 'a e 'Ofisi Haikomisiona 'a Tonga 'i Kenipela.

Ko e tokoni foki ki he polokalama FakalikuTonga na'e kau kiai 'a e ngaahi 'Ofisi Faka-Tipilometika 'o e ngaahi fonua 'i Kenipela pehe ngaahi kupu 'o e Pule'anga 'Aositelelia, ngaahi siasi 'o e kainga Tonga mo e kakai Tonga pehe ki he matakali kehekehe pe mo e ngaahi pisinis pehe ki he ngaahi kautaha tokoni pea na'e tataki 'eni 'e he Komiti Pili-e-Tauhala 'a ia na'e fokotu'u kene tokangaekina 'a e fakaakeake mei he sunami na'e to 'i Tonga.

'I he me'a 'a e Ta'ahine Pilinisesi na'a ne me'a ai ko e polokalama FakalikuTonga 'oku kei hokohoko atu pe 'ene ma'u 'a e ngaahi tokoni.

Na'e toe fakamahino 'e Louise Waterhouse 'oku 'i ai mo e ngaahi tokoni ia koe koloa pea 'oku a'u ki he ngaahi koloa tokoni fe'unga mo e pa'anga 'Aositelelia 'e 2.5 Miliona 'oku nau fakafolau ki Tonga 'o fakafou 'i he kautaha vaka Swire Shipping.

Na'e talitali lelei 'e he 'Eiki Palemia 'a e 'ofa ko'eni pea ne fakamahino ko e 'ofa ko'eni 'e a'utonu ia kiate kinautolu na'e uesia 'i he fakatamaki ko'eni na'e hoko ki he fonua.

'I he me'a 'a e 'Eiki Palemia na'a ne fakamahino ai 'a e tukupā 'a e Pule'anga ke fakakato 'a e ngaahi poloseki tokoni 'a e FakalikuTonga pea ke fakamanatu 'aki ha maka fakamanatu ke faka'ilonga 'aki 'a e 'ofa mo e tokoni 'a kinautolu na'e fakahoko e foaki ko'eni pea ke 'ata ki tu'a 'a e 'alunga 'o 'enau tokoni.

Na'e toe kole 'e he 'Eiki Palemia ki he Ta'ahine Pilinisesi ke fakaa'u atu mu'a 'a e 'ofa mo e hounga'ia 'a e Pule'anga 'o 'Ene 'Afio mo e kakai 'o Tonga kiate kinautolu na'a nau nima mafola 'o fakahoko 'a e 'ofa mo e tokoni ko'eni ki Tonga pehe ki he kaha'u 'o e fakaakeake ni.