Kaukaua hono tokonia ‘o Tonga mei mamani ^Featured

‘Oku ‘ikai ke toe ‘ekea ‘a e kei feinga ‘a e kau mataotao ‘i he saienisi ki he ‘atakai mo e mo’ungaafi ke makupusi ‘a e ‘uhinga mo hono fakamatala’i ‘a e tu’unga totonu na’e ‘i ai ‘a e mapuna ‘a e mo’unga afi Hunga Tonga mo Hunga Ha’apai.

Lolotonga ‘a e kei fakaakeake ‘a e fonua mo e kei talafili ‘a mamani pehe ki he motuhia ‘a e fetu’utaki mo mamani kuo toe fakatumutumu mo mamani ia he mahino mai koe toko 3 pe na’e pekia ‘i he fakatamaki ko’eni.

’I ha fakamatala mei he Televisone CCTV ‘a Siaina hili ‘a ‘enau ma’u ‘a e fetu’utaki ‘i he mitia faka-sosiale mo e ‘Eiki Minisita Fefakatau’aki Hon. Dr. Viliami Uasike Latu, ‘oku ‘ikai kenau malava ke fu’u tui mo’oni ‘oku kei mo’ui ha taha ‘i Tonga hili ‘a e fakatamaki ko’eni.

‘Oku makatu’unga foki ‘a e tui ko’eni ‘a e ngaahi kautaha ongoongo mei he lipooti faka-saienisi kuo nau ma’u mei he NASA mo e ngaahi kautaha faka-saienisi mo fakatotolo fakamamani lahi ‘a ia ‘oku mahino mei ai koe malohi ‘o e mapuna ko’eni ‘a e mo’unga afi Hunga Tonga mo Hunga Ha’apai na’e faufaufaua pea fakaofo pea ‘oku te’eki ke hoko ha me’a pehe ia ‘i mamani lolotonga ‘a ‘enau mo’ui pehe ki he kuonga ‘o e satelaite.

‘Oku ‘i ai mo e fakafuofua ko e malohi ‘o e mapuna ‘a e mo’unga afi ‘oku liunga 500 ‘a hono malohi he pomu ‘atomi na’e li ‘e ‘Amelika ‘i Hiroshima, Siapani ‘i he faka’osi’osi ‘o e tau lahi ‘a mamani hono 2 ‘i he ta’u 1945 pea na’e laumano ai ‘a kinautolu na’e pekia.

Kuo liliu kotoa ia koe koto tapuaki ki Tonga lolotonga ‘a e taimi fakaakeake ko’eni ‘i he lahi hono fakatokanga’i fakamamani lahi ‘o Tonga pea mo e ngaahi tokoni kuo a’utaki mai ki he fonua talu mei he kamata ‘a e fepuna’aki ‘a e ngaahi vakapuna tokoni mei he ‘aho Tu’apulelulu 20 ‘o Sanuali, 2022.

Kuo tu’uta ‘a e ngaahi vakatau tokoni mei Nu’usila mo ‘Aositeleia mo e koloa tokoni hange koe vai pehe ki hono fakahoko e ngaue ke savea’i ‘a e fakatamaki na’e hoko.

‘Oku ‘ikai fa’a lau ‘a e ngaahi vakapuna tokoni mei Nu’usila, ‘Aositelelia, Siapani, pehe ki he ngaahi fonua kuo nau fakaha mai tenau tokoni mai ka ‘oku te’eki ke a’u taki mai.

Kuo tokoni foki ‘e he Pangike ‘a Mamani (World Bank) ‘a e pa’anga ‘Amelika ‘e 8 miliona pea mo e Pangike Langa Fakalakalaka ‘a ‘Esia (ADB) kuo nau tokoni mai mo e pa’anga ‘Amelika ‘e 10 miliona ke toko ni ki he fakaakeake ‘a e fonua mei he fakatamaki na’e hoko.

‘Oku mahino pe foki ‘a e ngaahi tokoni fakataautaha mai he ngaahi famili ‘o e kakai ‘i Tonga ni pehe ki he tokoni mei he ngaahi kautaha tokoni fakataautaha ‘a ia ‘oku fakataumu’a kotoa mai pe ki he fonua.

‘Oku ‘i ai mo e ngaahi tokoni kehekehe mei he ngaahi fonua kehekehe ‘o mamani pea ‘oku hu’u mai ‘i he koloa mo e pa’anga pea ‘oku lau miliona pe moia.

‘Oku lolotonga fakahoko foki ‘a e ngaue ‘a e Pule’anga ki he fokotu’utu’u ke langa hake ‘a e ngaahi nofo’anga na’e maumau ‘i he fakatamaki ni.