Toe mapuna mo'unga afi Hunga Tonga-Hunga Ha'apai ^Featured

'Oku mahino ia mei he fakamatala mei he Va'a Sioloki 'a e Pule'anga na'e kamata pe 'a e ngaueue 'a e mo'unga afi ni mei he afiafi 'aneafi pea ko 'ene toe mapuna ko'eni 'oku lahi ange ia 'i he'ene 'uluaki mapuna 'i he mahina ko Tisema 2021.

'I he fakamatala mei he Ma'u Mafai 'oku fale'i 'e he Sioloki Pule 'a e Pule'anga Taniela Kula 'oku 'ikai hoko ha mofuike ko e 'uhinga pe he 'oku mamaha 'a e puna'anga 'o e afi 'o 'ikai loloto kene fakatupu ha mofuike.

'Oku 'ilonga lahi 'a e efu 'oku mapuna mei he mo'unga afi he ho'ata pongipongi 'o e 'aho ni pea na'e iku ai ki he toe foki ki Tongatapu 'a e Vakapuna 'a e Lulutai 'a ia na'e lolotonga folau ki Vava'u.

'Oku toe ma'u moe fakamatala mei he Ma'u Mafai ko e tahi 'i Nomuka, Mango mo Fonoi he ho'ata 'o e 'aho ni na'e toutou mamaha pe mo hu'a tukukehe ange 'a e 'iloa 'o e efu mo e ngaahi momo'i 'uli 'oku to hifo 'o afuhia 'i he 'Otu Motu ni.

Kuo fakahoko mei he Pule'anga ke tapuni 'a e ngaue faka-Pule'amnga 'i he ho'ata 'o e 'aho ni pea ke mateueu 'a e kakai 'o e fonua telia ha fakatamaki 'e ala hoko.

'Oku fakafuofua ko ha Tsunami 'e hoko 'e nofo pe he senitimita 'e 20 ki he 30 hono ma'olunga pea 'oku mahino pe 'oku te'eki ke fakatokanga 'a e Ma'u Mafai ia ke fetukutuku  'a e kakai ki ha feitu'u 'oku ma'olunga ange.

 'Oku fakatokanga mamafa 'a e Ma'u Mafai ke ta'ofi ha toutai pe koha kaukau tahi he ngaahi matafanga pea ke kei to'o pe 'a e ngaahi fakatali mei he ngaahi tanaki'anga vai.