Fakalelei’i sisitemi tele letiō ‘a Vava’ú Featured
11 ‘Aokosi, 2021. Na’e lava lelei ‘a hono fakalele’i ‘a e sisitemi tele letiō ‘a Vava’ú (Very High Frequency (VHF) radio system) ‘i he mahina kuo ‘osí hili ha palopalema ‘a e fetu’utaki fakafou ‘i he tele letiō. Ko e ngāue ni na’e fakahoko ia ‘e ha timi mei he Va’a Fetu’utaki ‘a e Potungāue MEIDECC.
Fakatatau ki he fakamatala ‘a e Talēkita ‘a e Va’a Fetu’utakí ‘Alifeleti Tu’ihalamaka ko e ngāue mahu’inga ‘eni na’e fakahokó koe ’uhí ko e sisitemi tele letiō ko ‘ení ‘oku ngāue’aki ‘e he ngaahi vaka folau tahí.
“Ko e fetu’utaki kotoa ‘a e ngaahi vaká ‘oku fou ki Vava’u tatau pē ‘i he ngaahi vaka fakalotofonua pea mo e ngaahi vaka mei tu’apule’angá ‘oku nau ngāue’aki ‘a e sisitemi ko ‘ení pea ‘oku toe tokoni lahi foki ki he fakahaofi mo’uí (search & rescue).”
“Ko e sisitemi ko ení ‘oku ngāue’aki ki ai ‘a e sēnolo (channel) 26 & 16. ‘Oku ngaue ‘aki ‘eni ‘e he vaka ‘a e kau polisí moe kasitomú ki hono pailate ‘o ha ngaahi vaka lalahi mei muli.
‘Oku fakahoko ai ‘ae feui’aki ‘a e vaka ‘ioté, ngaahi vaka toutaí pea mo kinautolu kuo lēsisita mo laiseni ‘a ‘enau tele letiō.
‘Oku ‘i ai kulupu ko e Vava’u Volunteer Maritime Response Association (VVMRA) kuo fokotu’u ‘i Vava’u ‘a ia ‘oku nau ngāue’aki ‘a e sēnolo 26 ke tuku atu ai ‘a e fakamatala ‘ea ‘i he ngaahi ‘aho taki taha pea ‘oku mahu’inga lahi ‘eni ki he kau folau tahí kenau ‘ilo’i ‘a e anga e tu’u ‘a e ‘ea ke palani fakatatau ki ai ‘enau ngaahi ngāué.”
‘Ikai ke ngata pē ‘i hono tufaki ‘a e fakamatala ‘eá ‘o ngāue’aki ‘a e sēnolo 26 ka ‘oku toe kau atu ki ai mo e ngaahi fanongonongo ‘oku mahu’inga ki he ngaahi vaká kenau ‘ilo’i.
“Ko e sēnolo 16 ‘oku ngāue’aki ia ki he ui tokoní pea ‘oku mātu’aki mahu’inga eni koe ’uhi ka ‘i ai ha fakatamaki ‘e hoko ‘i tahi ‘e lava pē ke afe atu ha vaka ‘o tokoni.”
Kuo laka hake ‘i he ta’u ‘e 30 ‘a hono fokotu’u ‘a e sisitemi ko ení pea ‘oku ‘i ai ‘a e fokotu’utu’u ke fetongi ‘a e me’a ngāue ni he kuo fu’u motu’a.
“Kuo laka hake ‘i he ta’u ‘e 30 ‘a hono fokotu’u ‘a e sisitemi ko ení pea ‘oku fokotu’u ia ‘i he taua ‘a e Kautaha Fetu’utaki ‘a Tongá (TCC) ‘i ‘Atalika. ‘Oku ‘i ai ‘a e palani ‘a e potungāué ke ‘omai ha naunau fo’ou ke fetongi’aki ‘a e sisitemi lolotongá.”
“Neongo na’a mau ‘osi tesi pē ‘a e me’a ngāue ni hili ‘a e ngāue na’e fai ki aí ‘a ia ko e mama’o ‘a hono ivi fakaletiō (VHF repeater) ko e 75km mei Neiafu ka ‘oku ‘i ai ‘emau faka’amu ke toe ma’u mai ha me’a ngāue ‘oku fo’ou koe’uhí ke toe lelei ange ai ‘a e fetu’utaki ‘a e vahefonuá fakafou ‘i he tele letiō.”
- MEIDECC
