Toloi vakapuna mei Brisbane 'amanaki tu'uta he mahina ni ^Featured

Ko e ngaahi fokotu’utu’u ko eni ke nga’unu ‘a e taimi folau mai ‘a e vaká mei ‘Aokosi ki Sepitemá ko e fokotu’utu’u ngāue ‘oku sio ki ai ‘a e Pule’anga ‘Aositēlēlia ke siofi ha mala’e vakapuna ‘e taha kehe mei he mala’e vakapuna ‘o Brisbane ke fakahoko ai ‘a e fefolau’aki ‘i he vaha’a ‘o ‘Aositēlēlia mo Tongá koe’uhí ko e tu’unga ‘oku ‘i ai ‘a e Covid-19 ‘i Brisbane.

Ko e mahu’inga taha ‘o e fokotu’utu’u ko ení koe’uhí ke ‘oua ‘e toe toloi ha vaka mei ‘Aositēlēlia ‘o kamata ‘i Sepitema.

Huhu Malu’i Covid-19

Kuo a’u ‘eni ki he toko 24,342 kuo nau ‘osi kau atu ki he polokalama huhu malu’i hoani Covid-19 ‘i Tonga ni mo ‘Eua. Fakatatau ki he fakamatala ‘a e Pule Lahi ‘a e Potungāue Mo’uí Toketā Siale ‘Akau’ola, ko e 93% kuo ‘osi hoani ‘a e huhu malu’i Covid-19.

Na’a ne pehē ko e toko 6,770 ‘eni ‘i Vava’u kuo nau ‘osi huhu malu’i ‘i he takai ‘uluakí.

Polokalama ‘ikai toe kolonitini ‘i Nu’usila

‘I he taimi tatau ‘oku hokohoko atu ai pē foki mo e ngāue mo e Pule’anga Nu’usilá ke kau atu a Tonga ni, Ha’amoa mo Vanuatu ‘i he faingamalie ni ‘o ‘ikai toe kolonitini ‘i Nu’usila, ‘o fakaangaanga ke kamata ‘i he mahina katu’ú.

‘E kau ki ai ha toe taha kuo foaki ki ai ‘e he Pule’anga Nu’usilá ha visa ke nau tū’uta ‘i Nu’usila pehē ki he kau ngāue toli fua’i’akaú, ‘o kau fakataha kiai ‘a e kau nofo fonua Nu’usila (citizen) mo e kau pepa nofo fonua (permanent resident).

- MEIDECC