Malōlō ‘a Helu Dr. Siosaia Langitoto koe taha ‘o e kau mateaki ‘i he fonua mo e ako Featured
Helu Dr. Siosaia Langitoto Helu
25 Me, 2021. 'Oku ofongi ma'u pe kitautolu 'e he pule 'a e Ta'ehāmai pea koe tā ia 'oku ongo pea uhu 'a hono ui atu ‘a e taha ‘o e kau mo’unga’i tangata ‘i he mala’e ‘o e ako ‘i Tonga ni ko Dr. Siosaia Langitoto Helu ‘a ia ‘oku toe ‘ilo’aki ‘a e hingoa tauhifonua ko e Helu ‘o Lotofoa Ha’apai.
Ko Helu koe taha ia ‘o e ni'ihi i falala’anga mo ‘iloa ‘i he fonua ni ‘i he mala’e kehekehe pe kae tautautefito ki he mala’e ‘o e ako mo e fakatotolo.
Ko e tehina foki ‘eni ‘o e Tama Tu’ipelehake ‘i he fokotu’utu’u ‘o hotau talatukufakaholo pea koia ‘a e ‘eiki mo e tauhifonua ‘o Lotofoa ‘i Ha’apai ko e tofi'a 'o e Tama Tu'ipelehake.
Na’e kau foki ‘a Dr. Helu ‘i he ni’ihi na’a nau hoko koe kau fa’u kolomu mo 'atikolo ‘i he ongoongo mo e Uepisaiti ‘a e Nepituno ‘a ia ‘oku ‘iloa koe Nepituno Tonga Online News pea na’e kau ‘a ‘ene ngaahi kolomu mo e ‘atikolo ‘i hono manakoa ‘e he kakai ‘o e fonua mo e kau lau ongoongo.
Na’a ne fo’u mo tohi e ngaahi kolomu lahi ‘i he mala’e ‘o e ako, sipoti, fonua mo e politikale pea na’e hoko ia koe tūhulu mo e fakamaama ki hono huluhulu ‘o e ngaahi kaveinga ni.
Ko Dr. Helu na’a ne ako ‘i he Ako Ma’olunga ‘o Tonga pea na’a ne hoko koe hau fakaleveleve he lele nounou ‘i he sipoti faka-Kolisi tautautefito ki he mita ‘e 100 mo e mita 200 ‘i he ngaahi ta’u na’e ‘i he Ako Ma’olunga ‘o Tonga ai pea 'oku kei manatu pe kiai 'a e tokolahi..
Na’e hiki ‘a e Helu ki he ‘Apiako ‘Atenisi pea hoko atu ai pe ki he ‘Univesiti ‘o ‘Atenisi ‘o ma’u ai hono faka’ilonga AA (Associate of Arts). Na’a ne hoko atu ai ki he ‘Univeisiti ‘o Victoria ‘i Wellington, New Zealand ‘o ma’u ai hono faka’ilonga BA 'i he mala’e ‘o e fika mo e saienisi. Na’a ne hoko atu ai ki he ‘Univeisiti ‘o Utah, USA ‘o mau ai hono faka’ilonga MSc pea toe hoko atu ai ki he ‘Univesiti ‘o Oregon USA ‘o toe ma’u ai hono faka’ilonga MSc ‘i he fika mo e saienisi.
Helu Dr Siosaia Langitoto Helu, Fetongikava Dr Viliami Uasikē Lātū Hūfanga Professor ‘Ōkusitino Māhina 'i he taha 'o e ngaahi tanaki tu'unga 'a e Tonga International Academy
Na'e ngaue foki 'a He;lu koe tokotaha faiako mo fakatotolo 'i he 'Univesiti 'o Oregon 'i Seattle Wasington kimu'a pea ne hiki ki Nu'usila ki he ‘Univeisiti ‘o ‘Aokalani (University of Auckland) 'o ngāue ai mo fakahoko ai ‘ene fakatotolo ki hono faka’ilonga PhD (Toketā Filosefa) 'i he mala'e 'o e fika.
Na’e toki foaki kia Helu ‘a e faka’ilonga PhD (Toketā Filosefa) ‘e he Tonga Tonga International Academy 'i he ta'u 2013 makatu’unga ‘i he’ene ngaahi ngāue kuo tohi mo ‘ene taukei mo mateaki 'i he mala’e ‘o e fika.
Dr Sivasundaram, Helu Dr Siosaia Langitoto Helu, Professor Hūfanga Dr ‘Ōkusitino Māhina mo Fetongikava Dr Viliami Uasikē Lātū ‘o e Tonga International Academy 'i he ta'u 2017
Na’e kaunga tonu atu foki ‘a Dr. Helu ki hono fokotu’u ‘a e ki’i ‘apiako koe Tonga International Academy ‘i he ta’u 2012 fakataha mo Hūfanga Professor ‘Ōkusitino Māhina, pehe kia Fetongikava, Dr Viliami Uasikē Lātū mo e ni'ihi kehe pea na'e ngaue mo tokoni 'a e kau ako tokolahi 'o e fonua ni ki he langa ngāue ko'eni 'o kau kiai 'a Failo Taufa, Sione Tutulu Finau, Maliu Takai, Sefita Tangi, Poasi Ngaluafe, Maika Haupeakui, Sione Akemeihakau Mokofisi, Uilou Samani, Tevita Latu Helu Jr. mo e ni'ihi tokolahi na'a nau poupou ki he ngāue ni.
Tanakitu'unga 'a Tonga International Academy 'i Tisema ta'u 2017 pea koe Fakaafe Fakalangilngi ko William Clive Edwards
Na’e ‘ikai toe hoko atu ‘a e ako’anga ni ‘i he ta’u 2018 makatu’unga ‘i he ‘uhinga fakapa’anga mo fakangāue ka na’e tokolahi ‘a e ni’hi mei he ki’i ako’anga ni na’a nau hoko atu ki Nu’usila mo Siaina ‘o fakakakato mei ai honau ngahai faka’ilonga fakaako ma'olunga ange pea kuo 'osi foki mai honau ni'ihi.
Dr Helu, Claude Tupou CEO 'a e Potungaue Ako mo e Penisimani Fififta ko e MInista Ako Malōlō 'i he polokalama foaki pale 'a e USP
Na'e fakahoko foki 'e Dr. Helu 'a e ngaahi ngāue faka-konisaluteni kehekehe pe 'o a'u ai pe ki he'ene malōlō mei he ngāue he ngahai ta'u mai pe kimui ni makatu'unga 'i he tu'unga fakamo'ui 'o 'a'u mai pe 'eni ki he'ene tatau mai kae folau.
‘Oku ‘i ai ‘a manatu melie ‘a e Nepituno Tonga Online News kia Dr. Helu mo e fengāue’aki kehekehe na’e fakahoko he mala’e ‘o e ako, ongoongo pehe ki he ngaahi fengaue’aki he tapa kehekehe ‘i he mo’ui.
Na’e pekia ‘a Dr. Helu ‘i he efiafi Tokonaki ko hono 22 ‘o Mē pea ‘oku ‘oatu ‘a e faka’apa’apa lahi ‘a e ongoongo ni ki he helo ni ‘a ia na’e hoko ko e takimu’a ‘i hono fakamaama ‘a e fonua.
‘Oku mo’oni e lea Tonga “oku mapaki ‘a e fā kae kei ‘alaha” pea mo e fakatauange kene toka ‘i he nonga mo e melino ‘i he malumalu 'o Satai”.
1 comment
-
'ETITA: 'Oku hounga ho'o fanongonongo mai kuo mavahe atu hotau tokoua ko Dr. Siosaia Langitoto Helu. Na'á ku langilangi'ia keu kaungā ngāue mo Dr. Helu pea mo kimoutolu 'a e kau ngāue mateaki'i ako 'ihe Tonga International Academy.
Ko e fānauako na'á nau sio ki honau kaha'ú 'o nau kaumai 'ihe takimu'a 'a Dr. Helu. Ko e anga maheni pe 'o e ngaahi fokotu'u ako 'i Tongá ko e tōmo'omo 'a e faka-pa'angá. Ka 'oku 'iai 'eku kei manatu melie ki he fānauakó mo kimoutolu kotoa kau faiako mo e kau poupoú.
Kaneongo ia, na'e 'ikai fakalele 'a e Tonga International Academy - ko e 'apiako tau'atāina mei he ngaahi Siasí mo e Pule'angá - 'ikai 'ihe founga na'e faihala'i ai 'e he 'apiako 'e taha 'oku nau lolotonga hopo ai 'i he fakamaau'anga laó.
'Ofa atu ki he fāmili 'o Dr. Helu, pea mo koe Dr. Uasikē, Dr. Māhina, Tevita Helu, mo e tamaiki ako kotoa. 'Oku 'iai e feinga ke fakahoko atu 'a e TIA 'ihe founga ako Online Learning. Ko e mahu'ingataha ke fakahoko 'a e faka'amu ke 'iai 'a e ngaahi komipiuta ke faka'aonga'i 'e he fānauakó kotoa.
Sione Ake Mokofisi - MBA; Director Business & Communications.