Foki mai ki Tonga ni kau pāsese ‘e 242 'aneafi ^Featured

Ko e toko 120 ai ko e kau toli fua’i ‘akau. Ko e tokolahi taha ‘eni ‘o e kau pāsese mei Nu’usila kuo fakafoki mai talu mei he kamata ‘a hono fetukutuku mai ‘a e kāinga Tongá ‘i Siulai ‘o e ta’u kuo ‘osí.

Fakatatau ki he fakamatala ‘a e Pule Lahi ‘a e Potungāue MEIDECC Paula Pouvalu Ma’u, “Tupu mei hono kaniseli ‘a e vakapuna mei Fisi ki he mahina ni ne fakatokolahi leva ‘a e fika ‘o e kau folau mei Nu’usilá.”

‘I he pongipongi ‘o e ‘aho ni ne tū’uta mai ‘a e vakapuna ‘a e Talofa Airlines mo e kau pāsese ‘e toko tolu mei Apia, Samoa pea ne foki atu ai pē mo e pāsese ‘e toko fā ‘o fakataumu’a ki Pangopango, Ha’amoa ‘Amelika.

“’E toe foki mai ‘a e vakapuna tatau pē na’e tū’uta ‘aneuhú mo e toko tolu mei Pangopango pea toki foki mo e faka’osi ‘o e kau pāsesé ko e toko fā. Ko e ngaahi fakamole ki he folau mai ‘a e vakapuna ni ‘oku fua pē ia ‘e he Pule’anga ‘o Ha’amoa ‘Amelika.”

“Ko e kotoa ‘o e kau pāsese ne fakafoki mai ‘aneafí mo e toko ono ‘i he ‘aho ni ‘oku vahevahe pē kinautolu ki he Hotele Tanoa pea mo e Kemi Makeké pea tenau kolonitini ai ‘i he ‘aho ‘e 21 ka hokó.”

Tu’unga ‘oku ‘i ai kau Tonga kolonitini ‘i Fisí

‘I he taimi tatau ‘oku kei siofi pē ‘e he Potungāue Mo’uí ‘a e tu’unga ‘oku ‘i ai ‘a e Covid-19 ‘i Fisi koe’uhí ‘oku ‘i ai ‘a e kau pāsese Tonga ‘oku ofi honau tokolahí ‘i he toko 40 ne nau foki mai mei ‘Amelika.

Ko e tokotaha Tonga na’e lipooti mai ‘i he ongoongo ‘a Fisí ‘oku puke he Covid-19 ‘oku tauhi pē ia fakatatau ki he ngaahi tu’utu’uni ‘a e Potungāue Mo’ui mo e Pule’anga ‘o Fisí.

“Ko e fuofua kulupu Tonga ‘eni mei ‘Amelika ne tali ‘e he Pule’anga Fisí kenau ō mai ‘o kolonitini aí. Tupu mei he ‘ikai ke ‘i ai ha nofo’anga kenau ‘atā ki ai hili ‘enau kolonitini ‘i Nadi, kuo tali ‘e he Kapinetí ‘aneafi ke ‘ave ha tokoni fakapa’anga ki he kau Tonga ne folau mai mei ‘Ameliká ke tokoni ki he totongi ‘a e ngaahi hōtele tenau nofo aí ‘o tali ai ki he vakapuna hokó.

Huhu Malu’i Covid-19

‘Oku ‘i he tu’unga fakafiemālie pē ‘a e Polokalama Huhu Malu’i Covid-19 fakatatau ki he lipooti fakamuimui mei he Potungāue Mo’uí.

‘I he’ene a’u mai ki he faka’osinga ‘o e uike kuo ‘osí kuo ‘ova ‘i he 10,000 ‘a e kakai kuo nau kau atu ki he polokalama ni ‘a ia ‘oku faka’avalisi ki he toko 760 ‘oku nau huhu malu’i Covid-19 ‘i he ‘aho.