Toloi puna mei Brisbane na’e teu tū’uta mai ‘i he 'aho 31 'o Ma’asi Featured
29 Ma’asi, 2021. Kuo tu’utu’uni ‘a e Kōmiti ki he Ngaahi Me’a Fakatu’upaké (NEMC) pea mo e Komiti ki hono Tokangaekina ‘o e Covid-19 ke toloi ‘a e folau mai ‘a e kau pāsese mei Brisbane ‘a ia na’e palani ke nau tū’uta mai ‘i he ‘aho Pulelulu ‘o e uike ni, 31 ‘o Ma’asi, 2021.
Na’e makatu’unga ‘a e tu’utu’uní ‘i he fakataputapui (lockdown) ‘a Brisbane kamata ‘i he 5pm efiafi ‘o e ‘aho ni koe’uhí ko e ngaahi keisi (case COVID-19) fo’ou ne toe hā ‘i he vahefonuá.
Fakatatau ki he Pule Lahi ‘a e Potungāue MEIDECC Paula Pouvalu Ma’u ‘e kei tū’uta mai pē ‘a vaka mei ‘Okalani, Nu’usila ‘i he ‘aho Pulelulu ‘o e uike ni pea mo e vaka mei Fisí ‘i he ‘aho 1 ‘o ‘Epelelí mo e kau pasese ‘oku ‘amanaki ke nau folau mai ai.
“Koe’uhí ke fakapapau’i ‘a e malu mo e hao ‘a e fonuá mei he Covid-19, ko e fale’i lelei taha mei he Potungāue Mo’uí ‘e lelei ange kapau ‘e toloi ‘a e vaka mei Brisbane kae toki mahino ange ‘amui e taimi ke toe folau mai ai.”
