Kau pāsesé toko 255 ‘amanaki kenau tū’uta ‘i he ‘aho 31 Ma'asi Featured
24 Ma’asi 2021. ‘Oku fakafuofua ki he kau pāsesé ‘e toko 255 ‘oku ‘amanaki kenau tū’uta mai ki Tonga ni ‘i he ‘aho Falaite uike kaha’ú mei ‘Okalani, Nu’usila pea mo Brisbane, ‘Aositelēlia.
‘I he ‘aho 1 ‘o ‘Epelelí ‘e folau ai ‘a e vakapuna Lulutaí ki Fisi ‘a ia ‘e totongi ‘e he Siasi ‘o Sīsū Kalaisi Kau Mā’oni’oni Ngaahi ‘Aho Kimui ni ke fakafoki mai ‘a e kau faifekau ‘a e Siasí pea mo e ni’ihi ‘o e kāinga Tonga ‘oku nau tukuvakā ‘i Fisí.
Fakatatau ki he Pule Lahi ‘a e Potungāue MEIDECC Paula Pouvalu Ma’u, kuo ‘osi ngāue ‘a e kōmití ke vahevahe ‘a e tokolahi ‘o e kau pāsese tenau omi ‘i he ‘aho 31 ‘o Ma’así pea mo e ‘aho 1 ‘o ‘Epelelí.
“Ko e vaka mei ‘Okalani Nu’usilá ‘oku fakafuofua ki he kau pāsese ‘e 102 ‘e omi he vaka ko iá ‘a ia ko e toko 90 ai ne tonu kenau foki mai ‘i he vaka ‘i Ma’asi ‘aho 3 ka koe’uhí ko e fakataputapui ‘i Nu’usilá ne toloi mai ai ‘a e vaká ki he faka’osinga ‘o e mahina ni.”
“Ko e tokolahi ‘a e kau pāsese mei Fisí kuo ‘osi fakapapau’i he taimi ni ko e toko 25 pea mo e toko 128 mei ‘Aositelēlia ‘a ia ko e toko 255 ia tuku kehe kapau ‘e toe ‘i ai ha liliu.”
‘Oku ‘amanaki ke tū’uta mai ‘a e vaka hokó hili ‘a e ‘aho 1 ‘o ‘Epelelí ‘i he ‘aho 28 ‘o ‘Epelelí pē.
