Loto mamahi lahi e kau tō meleni he Pule'anga ^Featured

'Oku mahino mei he fakamatala kuo ma'u 'e he ongoongo ni na'e alea'i 'e he Poutungāue Ngoue 'a e ngaahi loli uta koniteina ke fetuku 'a e ngaahi koniteina meleni ko'eni ki uafu ka na'e 'ikai ke hoko 'eni.

Na'e fakahoko leva 'a e fetu'utaki 'a e ni'ihi ko'eni na'e 'anautolu 'a e ngaahi koniteina meleni ki he Potungāue Ngoue ka na'e 'i Vava'u 'a e Minisita ia Lord Tu'ilakepa he folau lotu 'aukai 'a e Pule'anga.

'Oku 'ikai foki ke fu'u mahino ki he kau ngoue meleni 'a e 'uhinga ki he 'ikai 'asi ange 'a e ngaahi loli ke fetuku 'a e ngaahi koniteina meleni ki uafu pea 'oku nau fu'u loto mamahi mo ta'efiemalie lahi hili 'a e mavahe 'a e vaka ki Nu'usila 'i he 'aho Tokonaki 5 'o Tīsema.

Na'e fakahā 'e he tangata tō meleni  ko Kafoika Lautaimi 'a 'ene loto mamahi lahi he na'e kau 'i he ngaahi koniteina ko'eni 'a 'ene koniteina 'e 3 pea ko e toki mole lahi taha fakapa'anga 'eni kuo hoko kiate ia talu 'ene ngāue ki tōkanga.

'I he'ene fakamatala na'a nau tangi ki he Pule'anga hili hono ta'ofi hono hū atu 'a e meleni ki Nu'usila makatu'unga he ngāue 'a e 'inisekite lango hūhūkia ka na'e 'ikai fakahoko 'e he Pule'anga ha me'a.

'Oku nau fakamalo'ia 'a e tokoni 'a e New Zealand MPI [Ministry for Primary Industries] 'a ia na'etoe  'omai ai 'a e faingamalie fakangatangata ke toe hu ange ai 'a e meleni ka ko'eni  'oku toe fakamoleki pe 'e he ngāue ta'etokanga 'a e Pule'anga.

'Oku mahino mai foki 'oku kei 'i Vava'u 'a e 'Eiki Minisitā Ngoue ia Lord Tu'ilakepa pea 'oku te'eki ke 'omai ha tali mahino ia mei he Potungāue.