'Amanaki ke mavahe atu kau toli 'e toko 150 ki 'Aositelelia ^Featured

Kuo ma'u 'a e fakaha mei he Potungaue 'o e Ngaahi Ngaue Fakalotofonua 'oku makatu'unga 'eni mei hono matu'aki kei fiema'u 'a e ngaue toli ki he ngaahi faama 'i vahenga Kuinisilani 'i 'Aositelelia.

'Oku 'amanaki foki ke mavahe atu 'a e kulupu toli ko'eni 'i he 'aho 29 'o e mahina ni pea 'oku mahino mai ko e ni'ihi ko'eni na'a nau 'osi ngaue pe kinautolu 'i 'Aositelelia pea na'e fiema'u mai kinautolu ka na'a nau fihia 'i he fakataputapui 'uhinga 'i he panatemika covid-19.

Ko e faingamalie foki 'eni ki he ni'ihi ko'eni fakatatau ki he fakamatala mei he Pule Lahi 'o e Potungaue Ngaahi Ngaue Fakalotofonua Dr. Fotu Fisi'iahi pea koe taimi foki 'eni 'oku fiema'u lahi taha ai 'a e kau ngaue toli fo'i'akau ki 'Aositelelia.

'Oku mahino mei he Potungaue 'oku kei fakahoko pe 'a e fealelea'aki mo e fokotu'utu'u mo e ngaahi faama 'i 'Aositelelia pehe ki he Pule'anga 'Aositelelia ke kei hokohoko atu ai pe hono fakaava 'a e matapa ki hotau kainga Tonga.

'Oku toe matangofua foki 'a e fengaue'aki he 'oku kei hao 'a Tonga te'eki ke hu mai kiai 'a e covid-19 ki he fonua.