Hoko 'a Sione Fonua ko e Palesiteni Sosaieti Lao 'a Tonga ^Featured

Ko e konga mahu'inga 'o e fakataha ko'eni na'e kau atu kiai 'a hono fili 'o e kau ma'u lakanga ki he ta'u hono hoko pea pehe ki he ngaahi fokotu'utu'u ngaue 'a e sosaieti ki he kaha'u 'o kau kiai mo e founga hono fakalele 'o e ngaue fakalao 'i he fonua ni pe ki he fatongia kehe ki he fonua mo e kakai.

Na'e fili ai 'i he fakataha ko'eni 'a Sione Tu'itavake Fonua kene hoko ko e Palesiteni  'o e Sosaieti Lao 'a Tonga pea Tokoni Palesiteni leva 'a Dr. Viliami Uasike Latu.

Na'e hoko hoko atu ai pe 'a Fitilngi Fa'anunu he lakanga Sekelitali kae Tauhi Pa'anga 'a Lesina Tonga pea pehe ki he kau memipa Kosilio (Council) 'e toko 8 na'e fokotu'u ki he va'a fakahoko ngaue 'a e Sosaieti (Executive) kenau fakahoko 'a e ngaahi ngaue kuo fokotu'utu'u 'e he Sosaieti 'o fakatatau ki he Lao mo e Konisitutone 'a e Sosaieti pehe ki he'ene ngaahi tu'utu'uni ngaue.

Na'e fakatokanga'i makehe foki he fakataha ko'eni 'a hono fokotu'u 'o Petunia Tupou mo 'Alisi Numia Taumoepeau ki he tu'unga 'o e King's Counsel (KC) pe koe Loea 'a e Tu'i pehe ki hono fokotu'u 'o Dana Stevenson ki he lakanga ko e Konisela Fakalangilangi (Honorary Consul) 'a Pilitania ki Tonga.

'Oku fakafuofua ki he kau loea e toko 100 tupu si'i 'oku nau memipa 'i he Sosaieti Lao 'a Tonga pea koe tokolahi 'oku nau ngaue ki he ngaahi Potungaue mo e Poate 'a e Pule'anga pea ko hono toe 'oku nau ngaue he sekitoa taautaha mo fakataautaha (Private).

'I ha fakamatala 'a e Palesiteni fo'ou kuo fili 'oku lahi 'a e ngaahi ngaue 'a e Sosaieti ke fakalelei mo toe fakalakalaka'i ki mu'a ke fakatatau mo e taa'u 'o e taimi.

Na'a ne fakamalo'ia foki 'a e Palesiteni malolo Siosifa Tu'utafaiva mo e ngaue kuo lava he kuohili.