Ouau Misa hufia kamata ‘o e uike tokangaekina Feliuliuaki ‘o e ‘Ea ^Featured

Na’e fakahoko 'a e ouau lotu ni ki he falelotu Pasilika ‘o Sangato ‘Atonio Patua, Nuku’alofa ‘o tataki ‘e he ‘Epikopo ‘o Tonga mo Niue, Soane Patita Katinali Mafi ‘i he ‘aho Sāpate 20 Sepitema, 2020 ‘i ha fakaafe ‘a e Va’a Feliuliuaki ‘o e ‘Ea ‘oku ‘i he malumalu ‘o e Potungāue MEIDECC.

Na’e fakataipe ai ‘e Katinali Mafi ki he kau fakaafé mo e kainga lotú, ko e taimi kotoa pe ‘oku hoko ai e ngaahi fakatamaki ko e nunu’a e palopalema ‘o e Feliuliuaki e ‘Ea, ‘oku fakahāhā ai e fakaehaua lahi ‘oku fakahoko ‘e ha’a tangata ki he fakatupu ma’oni’oni ‘a e ‘Otua.

Na’a ne me’a ‘o pehē, ‘oku makehe atu e taimi ‘oku tangi ai ha fa’eé, ‘oku uhu pea ongo pea ‘oku pehē tofu pe ‘a e fakautuutu ke lahiange palopalema ‘o e Feliuliuaki ‘o e ‘Ea, “’oku tutulu pe lo’imata e fakatupú hange ha fa’ee (Mother Nature),” ko e me’a ia ‘a Katinali Mafi.

Na’e makehe ‘a e ‘aho, he na’e fakatefito e ngaahi ouau lalahi ‘o e Misa ‘i he taumu’a mo e kaveinga, “Tākanga ‘etau fohe ki ha Tonga Tuʻuloa,” pea naʻe kamata pe ‘i he hiva kamata ‘o e Misa ‘o fakamahino ‘e Katinali Mafi, ko e hiva kamata, ko e fa’u ia ‘a e Sāngato ‘o e Siasi ka ko e Pataloni ia ‘o e Fakatupú ko Sāngato Falakiko ‘Asisi.

Na’á ne fakataipe ‘a e mahu’inga ‘o e “Tākanga ‘etau Fohe” ki he fe’auhi Fautasi ‘i Ha’apai ‘a e taha pe ‘a e angi ki he kau ‘a’alo. Ke tau ngāue fakataha ‘a e ngaahi kupu fekaukau’aki mo e ngaahi va’a fengāue’aki ke ngāue’i ha “Tonga Tu’uloa.”

Kaekehe na’e tatau’aki ‘e Katinali Mafi ‘a e talamonū mo e faka’amu ‘e hoko e uike fakamanatua fakafōnua ‘o e Feliuliuaki ‘o e ‘Ea ke ne ‘oatu ha fekau ‘oku mahino mo toe mahu’ingaange ki he kakai e fonua.

Ko e ouau Misa foki ko eni ko e faka’amu pe ia ‘a e va’a Feliuliuaki ‘o e ‘Ea ke kamata’aki e uike fakamanatua ha lotu ‘o fili ai ‘a e Siasi Katolika kenau kamata’i.

Ne me’a foki ‘I he ouau Misa ko eni ‘a e Talafekau ‘Aositelelia, H.E Adrian Morrison, Minisita ‘o e MEIDECC ‘a ia ‘oku fakamalumalu ai ‘a e va’a Feliuliuaki ‘o e ‘Ea, Poasi Tei, Minisita Pa’anga Tevita Lavemaau, Minisita Toutai mo e Ngōue Nōpele Tu’ilakepa, Minisita Ako Siaosi Sovaleni, CEO ‘o e MEIDECC ko Paula Ma’u, taki ‘o e va’a Feliuliuaki ‘o e ‘Ea Lu’isa Tu’I’afitu Malolo, mo kinautolu ‘a e kau ngaue kotoa ‘o e va’a Feliuliuaki ‘o e ‘Ea pea mo e poupou ‘a e kainga lotu pehe ki he fonua.

‘Oku lele foki ‘a e uike fakamanatua fakafonua ko eni ‘o toki ‘osi ki he ‘aho Falaite 25 Sepitema, 2020.

- MEIDECC