Hoko atu hono fetuku mai hotau kainga mei muli Featured
24 ‘Aokosi 2020. ‘Oku fakafuofua ke tu’uta ‘i Nuku’alofa ni ‘a e vakapuna hono tolu ‘i hono fetukutuku mai ‘o hotau kainga Tonga ‘oku nau tukuvakā ‘i he ngaahi fonua mulí, ‘i he Tokonaki ‘o e uike ni, ‘Aokosi 29.
Na’e fakapapau’i ‘eni ‘i he fakataha’anga ‘a e Komiti Fakafonua ki he Ngaahi Me’a Fakatu’upake (NEMC) mo e Komiti Ngaue Fakafonua ki he COVID-19 (National Taskforce for COVID-19) ‘i he ho’ata ‘o e ‘aho ni ‘i he Fale Fakataha’anga Fa’onelua.
Ko e vaka ko ‘ení ‘e ha’u ia mei Fisi mo e kau pāsese ‘oku fakafuofua ki he toko 70.
‘I he taimi tatau kuo pau ke ‘uluaki fakahoko ‘a e sivi COVID-19 ‘a e kau pāsesé ki mu’a pea nau toki heka mai he vaká pea ke mahino ‘oku ‘ikai ke ‘i ai ha taha ‘oku ne ma’u ‘a e vailasí.
Ko e kotoa ‘o e kau pāsese ‘oku ‘amanaki kenau tu’uta mai ‘i he Tokonakí ‘e fakamavahe’i makehe (quarantine) kinautolu ‘i Makeke, Vainī.
‘Oku ‘i ai mo e palani ‘a e kōmití ke ha’u mo e vaka ‘e taha ‘i he Tokonaki ‘o e uike kaha’ú, Sepitema 5 mo e kau pāsese ‘oku fakafuofua ki he toko 25 mei Solomone mo Vanuatu pea ‘e fakamavahe’i makehe kinautolu ‘i he Kemi Taliaí.
‘I he lipooti mei he Pule Le’ole’o ‘a e Potungaue ki he Ngaahi Ngāue Lalahi Lopeti Heimuli, ‘oku faka’osi’osi ‘a e ngāue ki hono fakalelei’i ‘o Makeke pea ‘e lava ke fakamavahe’i makehe ki ai ‘a e toko 96. ‘Oku fakahoko foki mo e fakalelei ki he Kemi Taliai ‘a ia ‘e maau ia ki he uike kaha’ú pea ‘oku fakafuofua ‘e lava ke fakamavahe’i makehe ai ‘a e toko 52.
