Huufi Tama Pilinisi Kalauni Falelotu Fungasaione 'o Leimatu'a ^Featured

Ko e katoanga fakamafana 'eni ki he kainga 'o Fotu 'a e hoko 'enau ngaahi visone mo e 'amanaki 'o mo'oni pea tumutumu 'aki 'a hono huufi honau falelotu 'a ia na'e laka 'i he ta'u 'e 1 mo e ngaahi mahina 'a e ngaue na'e fakahoko kiai.

Ko e ngaue foki ki he falelotu ko'eni 'o Leimatu'a na'e 'ikai koha langa falelotu fo'ou ka ko hono toe fakalelei foki 'eni kihe falelotu 'o e kainga 'a ia na'e talu hono langa 'i he ta'u 1964.

'I he fakamatala ngaue na'e fakahoko 'e he sekelitali 'a e siasi 'o Leimatu'a Sione Loupaini Finau na'e mahino mei ai ko e ngaue ko'eni na'e ofi 'i he pa'anga 'e 2 miliona tukukehe pe 'a e ngaahi tokoni tokoni pa'anga mei he kakai taautaha mo e  ngaahi potu siasi kaunga'api 'o e vahenga ni mo e naunau teuteu 'o e falelotu ko e tokoni ia 'a e kainga Leimatu'a pe ki he ngaue ko'eni.

Na'e aofangatuku 'aki 'a e katoanga ko'eni 'a e tukumo'ui 'a e kainga pea na'e sea ai pe 'a e Ma'u Tofi'a Fotu pea na'e laka hake 'i he pa'anga 'e 5 kilu 'a e katoanga ko'eni.

'I hano fakama'opo'opo 'e he Sekelitali Lahi 'a e Siasi Uesiliana Tau'ataina 'o Tonga Dr. Tevita Koloa'ia Havea 'a e katonga ko'eni 'o fakafofonga'i 'a e Siasi Uesiliana Tau'ataina 'o Tonga na'a ne me'a ai ko e ngaue ko'eni ki he falelotu Fungasaione 'oku 'ikai ha mo'ua pea 'oku kei toe lahi pe mo e pa'anga 'a e Talasiti 'a Leimatu'a.

Ko e ngaue foki ko'eni na'e fakahoko 'e he kautaha Cabella 'a e langa pea koe mape mo e palani 'o e falelotu na'e taa ia mo teuteu 'e Faifekau Dr. Taukei 'Ahomana.

Na'e me'a foki 'i he katoanga ni 'a e 'Eiki Kovana Vava'u Faifekau Lord Fakatulolo, Faifekau Sea 'o e Vahefonua Tu'ipulotu Faletau, kua faifekau tokolahi mo e kainga Leimatu'a na'e folau mei muli mo e kau fakaafe tokolahi.