‘Ikai tali Fakamaau’anga tangi ‘a e MEIDECC na’e ‘uli’i ‘e Ian Jones ‘a e ‘Atakai ^Featured

Ko Ian Jones koe matapule muli ‘oku nofo ‘i Pangaimotu ‘i he kamata’anga ‘o Pangaimotu hili ‘a e ‘ahanga ‘i Toula. Ko e matapule ko ‘eni ‘oku ‘ikai sola kiai ‘a e tokolahi he ‘oku ‘i ai hono motele ‘i he ‘elia pe ko’eni koe Vava’u Villa pea koia ‘oku ne fakafofonga’i ‘a e Kautaha Queen Vanilla ‘a ia na’a nau fakamoleki ‘a e pa’anga ‘e lau miliona ki hono fakakake ‘o e ngoue vanila ‘i he vahefonua Vava’u.

Na’e faka’ilo foki ‘a Ian Jones ‘e he Potungaue ‘Atakai fekau’aki mo’ene fufulu ‘ene tangike sepitiki ‘a ia na’e fakahoko ‘i he ‘aho 15 ‘o Sepitema 2017 pea koe fufulu ko’eni na’e fakahoko ‘aki ‘a e faito’o mo e ngaahi kemikale fufulu angamaheni foki ‘i he taumu’a ke lava ‘a Jones ‘o hu ki he loto tangike ke fakalelei mo ngaohi ‘a e housi ‘i he loto tangike ko’eni na’e poloka.

Na’e hua’i foki ‘a e vai ko’eni ‘i he konga pe ‘o e ‘api ‘oku nofo ai ‘a Jones pea na’a ne fakapapau’i ‘e ‘ikai uesia heni ‘a e ‘atakai he koe feitu’u pe ‘eni ‘oku nofo ai mo hono ‘api nofo’anga pea ‘e ‘ikai tene fu’u fakavalevale ke fakahoko ha ngaue pango pehe ni ke uesia ai ia mo hono famili.

Na’e fakahoko ‘a e fufulu ko’eni ‘aki ‘a e lita vai ‘e 40 pe lahi hake pea na’e ‘ikai ke huhua ‘a e vai ko’eni ki tahi ‘o hange koe tukuaki’i mamafa na’e fakahoko kiate ia.

‘I he fakamatala ‘i he fakatonutonu ni na’e na’e ‘uluaki ‘alu ‘a e loli ia ‘o hua’i ‘a e uta sepitiki ki Kalaka koe lingi’anga sepitiki ‘oku ngaue’aki ‘i he vahefonua Vava’u pea foki mai ke toki fakahoko ‘a e ngaue ko’eni.

‘Oku malie ‘a e keisi ko’eni he na’e ‘i ai tonu ‘a e ‘a e matapule Tonga ko Kukuana Tanginoa mei Pangaimotu na’e ngaue kia Jones koe tangata tauhi’api mo fafanga puaka pea na’a ne faitaa’i ‘a hono tukuange ‘e Jones ‘a vai ko’eni mei he loli sepitiki ‘i hono ‘api nofo’anga.

Na’e fakahoko foki ‘e he matapule ni ia ‘a e kaiha’a ‘i he ‘api ‘o Jones pea na’e teu ke launga’i e Jones ki he Potungaue Polisi. Na’e fakamanamana’i ‘e he matapule ni ‘a Jones tene launga’i ki he MEIDECC ‘e ne hua’i ‘a e loli sepitiki pea he’ikai tene fakahoko ‘a e launga kapau ‘e ‘ikai launga’i ‘e Jones ‘ene kaiha’a.

Na’e fakaha ‘e Jones ki he matapule ni ke ‘alu ‘o launga’i he ‘oku ‘ikai ha kaunga ‘ene tukuange ‘a e vai fufulu kuo ‘osi faito’o ‘i he elia ‘oku nofo ai pea ‘oku ‘ikai ha lao ia ‘e maumau ai.

Na’e hoko atu pe foki ‘a Jones ia ‘o launga’i ‘a Tanginoa ko’ene kaiha’a ‘ene puaka ‘e 8 pea na’e tautea heni ‘a Tanginoa ‘o mo’ua ‘i he Fakamaau’anga pea toe fakamaloloo’i ‘e Jones mei he ngaue.

Na’e tupu heni ‘a e launga ‘a Tanginoa ki he MEIDECC ‘o Vava’u pea tupu ai ‘a e fakatonutonu ko’eni.

Na’e ‘ohake foki ‘e he tokotaha ni ‘i he hopo hono faka’ilo ‘o Jones ‘o pehe na’a ne hua’i ‘a e loli sepitiki ‘e ono ki he ‘elia tahi ‘o Pangaimotu ka na’e ‘ikai ha fakamo’oni pe koha fekau’aki moe fakamo’oni ‘i he sivi na'e fakahoko ‘e he Potungaue ‘Atakai.

Na’e tufa mai kia Jones ‘a e Tohi Fakatokanga ‘o e Maumaulao (Infingement Notice) ‘i he 23 ‘o Novema 2017 pea na’e fiema’u ke totongi ‘e Jones ‘a pa’anga ‘e $4000-00. Na’e loto pe 'a Jones ke totongi ‘eni pea na'a ne ‘a e pa’anga ‘e $4000-00 ko’eni ‘i he ‘aho 27 ‘o Novema 2017.

‘I he ‘aho 22 ‘o Me 2018 na’e tohi mai ai ‘a e va’a ‘o e MEIDECC ‘i Vava’u kia Jones ke fakafoki (refund) mai ‘a e pa’anga ‘e $2000-00 kiate ia he na’e hala hono fakakau ‘i he Tohi Fakatokanga ‘o e Maumaulao ‘a e Tu'utu'uni Fika 14(2)(b) mo e 14(2)(c).

‘Oku malie foki he na’e toe faka’ilo pe ‘e he MEIDECC ia ‘a Jones hili koia na’e ‘osi tufa kate ia ‘a e tohi mo’ua pea ne ‘osi totongi.

Na’e hoko atu ai ‘a e fakatonutonu ko’eni ‘i he Fakamaau’anga Polisi ‘i Vava’u pea na’e pau ai ke tukuange ‘e he Fakamaau Polisi ia ‘a Jones.

Na’e tangi heni ‘a e Pule’anga (MEIDECC) pea iku ai ki he tu’utu’uni ko’eni ‘o e ‘aho 2 ‘o Novema pea fakamahino ai ‘e he Fakamaau’anga Lahi ‘oku ‘ikai ha fakamo’oni ia ‘oku useia ‘a e ‘atakai pea ‘oku fekau’aki mo e ngaue ‘a Jones.

‘Oku fakaloloma foki he na’e hoko heni ke taaufehi’a ‘a e kakai ia ‘o Vava’u kia Jones pea iku ki he lele mo e kemipeini ‘a e MEIDECC pea taketi’i ‘a e matapule ni.

Kuo fakaha foki mei he loea ‘a Jones ko William Clive Edwards ‘oku te’eki mahino pe koe ha e me’a ‘e hoko atu kiai ka ‘oku mahu’inga ke fakama’a ‘a e hingoa ‘o Jones mei he ngaahi tukuaki’i loi mo hala pehe ki hono taketi’i ‘o ‘ona ‘e he ni’ihi ‘oku nau taaufehi’a kiate ia.

‘Oku ‘ikai ngata heni ka ‘oku uesia ‘a e ngaahi ngaue tokoni ‘a Jones ki he kakai ‘o Vava’u pea ta’ofi mo e ngaahi tokoni na’e ‘amanaki ke fakafou mai ‘ia Jones mei he ngaahi kautaha tokoni muli makatu’unga hono tukuaki’i mo e kemipeini fakalotokovi fekau’aki mo e matapule ni.